തിരുവനന്തപുരം: ലോകോത്തരമായ ഭരണഘടന രാജ്യത്തിന് സംഭാവന ചെയ്യുന്നതില്‍ മുഖ്യപങ്ക് വഹിച്ച വ്യക്തിയായിരുന്നു ഡോ.ബി.ആര്‍.അംബേദ്ക്കറെന്ന് കെ.പി.സി.സി. പ്രസിഡന്റ് വി.എം.സുധീരന്‍. ഇന്ദിരാഭവനില്‍ ഡോ.ബി.ആര്‍.അംബേദ്ക്കറുടെ 60ാം ചരമവാര്‍ഷിക അനുസ്മരണ സമ്മേളനം ഉദ്ഘാടനം ചെയ്തു സംസാരിക്കുക ആയിരുന്നു അദ്ദേഹം.
കാലമെത്ര കഴിഞ്ഞിട്ടും ഇന്നും ദലിത് ആദിവാസി സമൂഹം രാജ്യത്ത് പലവിധ ചൂഷണത്തിന് വിധേയരാകുന്നുണ്ട്.കേന്ദ്രസംസ്ഥാന സര്‍ക്കാരുകള്‍ പ്രഖ്യാപിച്ച ക്ഷേമപദ്ധതികളുടെ ആനുകൂല്യം അവരിലേക്ക് എത്തുന്നില്ല.ഇത്തരം ചൂഷണം നടക്കുന്നതിനാലാണ് തീവ്രവാദ പ്രസ്ഥാനങ്ങളും മാവോവാദി പ്രസ്ഥാനങ്ങളും തലപൊക്കുന്നത്. അതുകൊണ്ട് ദലിത് ആദിവാസി വിഭാഗങ്ങളെ ചൂഷണവിമുക്തമാക്കുന്ന സാഹചര്യം ഉണ്ടാക്കേണ്ടത് പരമപ്രധാനമാണെന്നും സുധീരന്‍ പറഞ്ഞു.
എല്‍.എല്‍.എമ്മിന് ഫസ്റ്റ് ക്ലാസ് നേടിയ എം.സ്.കെ .കോളനിയിലെ അഡ്വ.മഞ്ചുവിന് ക്യാഷ് അവാര്‍ഡും ചലചിത്ര സംവിധായകന്‍ പത്മകുമാറിന്റെ രൂപാന്തരം എന്ന സനിമയില്‍ അഭിനയിച്ച ബാലതാരം രജാജിനഗര്‍ കോളനിയിലെ സ്‌നേഹയ്ക്കും കെ.പി.സി.സി.യുടെ ഉപഹാരവും ചടങ്ങില്‍ സമ്മാനിച്ചു.
കെ.പി.സി.സി. വൈസ് പ്രസിഡന്റ് ഭാരതിപുരം ശശി, കെ.പി.സി.സി. ജനറല്‍ സെക്രട്ടറി തമ്പാനൂര്‍ രവി, മുന്‍മന്ത്രി വി.എസ്. ശിവകുമാര്‍ എം.എല്‍.എ, മഹിളാ കോണ്‍ഗ്രസ് പ്രസിഡന്റ് ബിന്ദു കൃഷ്ണ, കെ.പി.സി.സി ട്രഷറര്‍ ജോണ്‍സണ്‍ എബ്രഹാം, സെക്രട്ടറിമാരായ മന്നാര്‍ അബ്ദുല്‍ ലത്തീഫ്,മണക്കാട് സുരേഷ് ,ദലിത് കോണ്‍ഗ്രസ് സംസ്ഥാന പ്രസിഡന്റ് കെ.വിദ്യാധരന്‍ എന്നിവരും പങ്കെടുത്തു.