ജിദ്ദ: എണ്ണ വിലയിടിവു തടയാന്‍ ഉല്‍പാദക രാജ്യങ്ങളുടെ കൂട്ടായ്മയായ ഒപെക്കിനൊപ്പം പ്രതിദിനം 5.62 ലക്ഷം ബാരല്‍ ഉല്‍പാദനം കുറയ്ക്കാന്‍ മറ്റു രാജ്യങ്ങളും തീരുമാനിച്ചു. വിയന്നയിലെ ഒപെക് ആസ്ഥാനത്തു കഴിഞ്ഞ ദിവസം നടന്ന ചര്‍ച്ചയിലാണു തീരുമാനം. ഒപെക് രാജ്യങ്ങള്‍ പ്രതിദിനം 12 ലക്ഷം ബാരല്‍ കുറയ്ക്കാനാണു കഴിഞ്ഞമാസം അവസാനം തീരുമാനിച്ചത്. ഇതോടെ പ്രതിദിനം 17.62 ലക്ഷം ബാരലിന്റെ കുറവാണുണ്ടാകുക.
ആഗോള ഉല്‍പാദനത്തിന്റെ രണ്ടു ശതമാനം വരുമിത്. രണ്ടുവര്‍ഷമായി തുടരുന്ന എണ്ണ വിലയിടിവു പിടിച്ചുനിര്‍ത്താന്‍ സഹായിക്കുന്ന നിര്‍ണായക തീരുമാനമാണിതെന്നാണു വിലയിരുത്തല്‍. 15 വര്‍ഷത്തിനു ശേഷമുള്ള സംയുക്ത തീരുമാനമാണിത്. ഒപെക് തീരുമാനത്തെത്തുടര്‍ന്ന് ബാരലിന് 50 ഡോളറിനു മുകളില്‍ തുടരുകയാണ് എണ്ണവില. വില 50 ഡോളറില്‍ താഴേക്കു പോകാതെ പിടിച്ചുനിര്‍ത്തുകയാണ് ഉല്‍പാദക രാജ്യങ്ങളുടെ ലക്ഷ്യം. ഒപെക് ഇതര രാജ്യങ്ങള്‍ ആറുലക്ഷം ബാരല്‍ കുറയ്ക്കുന്നതു സംബന്ധിച്ച് സഊദി അറേബ്യയും റഷ്യയും തമ്മില്‍ നേരത്തെ നടന്ന ചര്‍ച്ചകളില്‍ ധാരണയിലെത്തിയിരുന്നു.ഒപെക് ഇതര രാജ്യങ്ങളുമായി ധാരണയിലെത്തിയെന്നും അതിന്റെ വിശദാംശങ്ങള്‍ തീരുമാനിക്കുക മാത്രമേ ബാക്കിയുള്ളൂവെന്നും സഊദി ഊര്‍ജമന്ത്രി ഖാലിദ് അല്‍ ഫാലിഹ് പറഞ്ഞു. ഒപെക്കിനു പുറത്തുള്ള 12 രാജ്യങ്ങള്‍ ഉല്‍പാദനം കുറയ്ക്കുന്നതില്‍ പങ്കാളികളാകുമെന്നാണു പ്രതീക്ഷയെന്ന് ഒപെക് സെക്രട്ടറി ജനറല്‍ മുഹമ്മദ് ബര്‍ക്കിന്‍ഡോ പറഞ്ഞു.
റഷ്യയ്ക്കു പുറമേ അസര്‍ബൈജാന്‍, കസാക്കിസ്ഥാന്‍, ഒമാന്‍, മെക്‌സിക്കോ, സുദാന്‍, ബഹ്‌റൈന്‍, മലേഷ്യ, ബ്രൂണെ തുടങ്ങിയ രാജ്യങ്ങളുടെ പ്രതിനിധികളും വിയന്ന ചര്‍ച്ചയില്‍ പങ്കെടുത്തു.