പാര്‍ലമെന്റിന്റെ ശൈത്യകാല സമ്മേളനം അവസാനിക്കാന്‍ രണ്ട് ദിവസം മാത്രം ശേഷിക്കെ നോട്ട്‌നിരോധം ഉള്‍പ്പെടെയുള്ള വിഷയങ്ങള്‍ ഇന്നും ഇരുസഭകളെയും പ്രക്ഷുബ്ധമാക്കി. ബഹളത്തെ തുടര്‍ന്ന് പാര്‍ലമെന്റിന്റെ ഇരുസഭകളും 12 മണിവരെ നിര്‍ത്തിവച്ചു. ഭരണ- പ്രതിപക്ഷങ്ങള്‍ ഏറ്റുമുട്ടിയതിനെ തുടര്‍ന്നാണ് സഭ നിര്‍ത്തിവെച്ചത്.

നോട്ട് അസാധുവാക്കല്‍ വിഷയത്തില്‍ തങ്ങളെ സംസാരിക്കാന്‍ അനുവദിക്കുന്നില്ലെന്ന് പ്രതിപക്ഷം ആരോപിച്ചു. പ്രധാനമന്ത്രിയെ പ്രധാനപ്രതിയാക്കി നോട്ട് വിഷയത്തില്‍ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി ഗുരുതര ആരോപണങ്ങള്‍ ഉന്നയിച്ചിരുന്നു.

അതേസമയം അഗസ്റ്റ വെസ്റ്റലാന്റ് അഴിമതിയില്‍ പുതിയ വെളിപ്പെടുത്തലുകള്‍ വന്ന സാഹചര്യത്തില്‍ അത് ഉയര്‍ത്തിക്കാട്ടിയാണ് ഭരണപക്ഷം പ്രതിപക്ഷത്തെ നേരിട്ടത്. ഇതോടെ സഭാ നടപടികള്‍ നിര്‍ത്തിവെക്കുകയായിരുന്നു.