പയ്യോളി: തിക്കോടി പഞ്ചായത്ത് പ്രസിഡന്റ് പദവിയെ സംബന്ധിച്ചുള്ള തര്‍ക്കത്തിനൊടുവില്‍ ലീഗിന് പ്രസിഡന്റ് പദവി ലഭിച്ചതില്‍ കോണ്‍ഗ്രസിലെ എ വിഭാഗത്തിന് ക്ഷീണമായി. അതേസമയം മുസ്്‌ലിംലീഗിന് പ്രസിഡന്റ് സ്ഥാനം ലഭിച്ചത് ഐ വിഭാഗത്തിന്റെ ഇടപെടലിലൂടെയാണെന്ന പരാതി ഉയരുകയും ചെയ്തു. ലീഗിനാണ് അടുത്ത രണ്ടുവര്‍ഷത്തെ പ്രസിഡന്റ് സ്ഥാനമെന്ന ജില്ലാ യു.ഡി.എഫിന്റെ തീരുമാനം വന്നയുടെ പഞ്ചായത്തിന്റെ പലഭാഗങ്ങളിലും കോണ്‍ഗ്രസ് പ്രവര്‍ത്തകര്‍ പ്രതിഷേധം ഉയര്‍ത്തുകയുണ്ടായി. പെരുമാള്‍പുരത്ത് കോണ്‍ഗ്രസ് പതാക താഴ്ത്തിക്കെട്ടി മീതേ കരിങ്കൊടി കെട്ടി. ലീഗിന് പ്രസിഡന്റ് സ്ഥാനം കിട്ടിയപ്പോള്‍ വൈസ് പ്രസിഡന്റ് സ്ഥാനം എ വിഭാഗത്തിന് നല്‍കാതെ ഐ വിഭാഗം കയ്യടക്കിയെന്നാണ് പറയുന്നത്. നേരത്തേ ഐ വിഭാഗത്തില്‍ നിന്നും എ വിഭാഗത്തിലേക്ക് മാറിയ പി.ടി ശശിഭൂഷന് പ്രസിഡന്റ് പദവി ലഭിക്കാതിരിക്കാന്‍ ഐ വിഭാഗവും ലീഗും ഒത്തുകളിച്ചെന്നാണ് പുതിയ ആരോപണം.