കോഴിക്കോട്: അനവധി നല്ല കാര്യങ്ങള്‍ക്ക് പ്രയോജനപ്പെടുന്ന നവമാധ്യമങ്ങള്‍ വ്യക്തികളിലും സമൂഹത്തിലും വരുത്തുന്ന ദോഷങ്ങളെ കുറിച്ച് ജാഗ്രത പുലര്‍ത്തണമെന്ന് മേയര്‍ തോട്ടത്തില്‍ രവീന്ദ്രന്‍.
ജില്ലയിലെ മാധ്യമ പ്രവര്‍ത്തകര്‍ക്കായി പി.ആര്‍.ഡിയുടെയും കോഴിക്കോട് പ്രസ് ക്ലബിന്റെും ആഭിമുഖ്യത്തില്‍ 'നവമാധ്യമങ്ങള്‍ ഗുണവും ദോഷവും ' വിഷയത്തില്‍ സംഘടിപ്പിച്ച സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം.
നവമാധ്യമങ്ങളുടെ സൗകര്യങ്ങള്‍ ഡൗണ്‍ലോഡ് ചെയ്യപ്പെടുന്നതോടൊപ്പം വ്യക്തികളുടെ സ്വകാര്യതയും നഷ്ടപ്പെടുകയാണെന്ന് കോഴിക്കോട് സൈബര്‍ സെല്ലിലെ ഉദ്യോഗസ്ഥനായ കെ.ബീരജ് അഭിപ്രായപ്പെട്ടു. മൊബൈല്‍ ഫോണില്‍ സേവ് ചെയ്യുന്ന എ.ടി.എം കാര്‍ഡിന്റെ പിന്‍ നമ്പറും ബാങ്ക് അക്കൗണ്ട് നമ്പറുമെല്ലാം ഇങ്ങനെ അന്യന്‍മാരുടെ കൈകളിലെത്തുകയും അവര്‍ അവ ഉപയോഗപ്പെടുത്തി തട്ടിപ്പ് നടത്തുകയും ചെയ്യുന്നു. പ്രസിഡന്റ് കമാല്‍ വരദൂര്‍ അധ്യക്ഷത വഹിച്ചു. ജില്ലാ ഇന്‍ഫര്‍മേഷന്‍ ഓഫിസര്‍ കെ.ടി ശേഖര്‍, ജില്ലാ പ്രൊബേഷന്‍ ഓഫിസര്‍ അഷ്‌റഫ് കാവില്‍, പ്രസ് ക്ലബ് സെക്രട്ടറി എന്‍.രാജേഷ്, ജോയിന്റ് സെക്രട്ടറി കെ.സി റിയാസ്, ജേണലിസം ഇന്‍സ്റ്റിറ്റ്യൂട്ട് ഡയറക്ടര്‍ വി. ബാലകൃഷ്ണന്‍ സംസാരിച്ചു.