നീലേശ്വരം: കോസ്‌മോസ് പള്ളിക്കര ആതിഥ്യമരുളുന്ന കോസ്‌മോസ് സെവന്‍സിനു നാളെ കിക്കോഫ്. നീലേശ്വരം രാജാസ് മൈതാനിയില്‍ തയാറാക്കിയ ഫ്‌ളഡ് ലിറ്റ് സ്റ്റേഡിയത്തിലാണു മത്സരങ്ങള്‍.
നഗരസഭയിലെ അവശതയനുഭവിക്കുന്ന ഫുട്‌ബോള്‍ താരങ്ങളുടെ ക്ഷേമവും ചിറപ്പുറത്തെ ബഡ്‌സ് സ്‌കൂളിന്റെ വികസനവും ലക്ഷ്യമാക്കിയാണു അഖിലേന്ത്യാ ഫുട്‌ബോള്‍ ടൂര്‍ണമെന്റ് സംഘടിപ്പിക്കുന്നത്. ഇരുപതു ടീമുകളാണു മാറ്റുരയ്ക്കുക.
ജനുവരി എട്ടിനാണു ഫൈനല്‍. വിജയികള്‍ക്കു ഒരു ലക്ഷം രൂപ കാഷ് അവാര്‍ഡു ലഭിക്കും. ഏഴായിരം പേര്‍ക്കിരിക്കാവുന്ന സ്റ്റേഡിയമാണു ഒരുക്കിയിരിക്കുന്നത്.
നാളെ രാത്രി ഏഴിനു മന്ത്രി ഇ ചന്ദ്രശേഖരന്‍ ഉദ്ഘാടനം ചെയ്യും. എം രാജഗോപാലന്‍ എം.എല്‍.എ പഴയകാല ഫുട്‌ബോള്‍ താരങ്ങളെ ആദരിക്കും. ഉദ്ഘാടന മത്സരത്തില്‍ മുസാഫിര്‍ എഫ്.സി രാമന്തളി കോട്ടപ്പുറം നാഷണല്‍ എഫ്.സി (മെഡിഗാഡ് അരീക്കോട്)യുമായി ഏറ്റുമുട്ടും.