തിരുവനന്തപുരം: കറന്‍സി പിന്‍വലിക്കലിനെ തുടര്‍ന്ന് രാജ്യത്തുണ്ടായ ദുരിതങ്ങള്‍ പരിഹരിക്കാനുള്ള നടപടി സ്വീകരിക്കുക, സഹകരണ മേഖലയെ തകര്‍ക്കാനുള്ള കേന്ദ്ര സര്‍ക്കാര്‍ നീക്കം ഉപേക്ഷിക്കുക തുടങ്ങിയ ആവശ്യങ്ങള്‍ ഉന്നയിച്ച് ഡിസംബര്‍ 29ന് എല്‍.ഡി.എഫ് സംഘടിപ്പിക്കുന്ന മനുഷ്യച്ചങ്ങല വിജയിപ്പിക്കാന്‍ സി.പി.ഐ ജില്ലാ കൗണ്‍സില്‍ യോഗം ആഹ്വാനം ചെയ്തു. കക്ഷി-രാഷ്ട്രീയത്തിന് അതീതമായി കേരളത്തിന്റെ വികസനത്തിന് വലിയ സംഭാവനകള്‍ നല്‍കിയ സഹകരണ മേഖലയെ ഇല്ലാതാക്കാനുള്ള കേന്ദ്രസര്‍ക്കാരിന്റെ നീക്കം ചെറുത്തു തോല്‍പ്പിക്കേണ്ടത് കേരളത്തിന്റെയാകെ ആവശ്യമാണ്. ഇതിന്റെ ഭാഗമായി എല്‍.ഡി.എഫ് പ്രഖ്യാപിച്ച മനുഷ്യച്ചങ്ങല വന്‍വിജയമാക്കാനുള്ള പ്രവര്‍ത്തനങ്ങളില്‍ പാര്‍ട്ടിയും വര്‍ഗ-ബഹുജന സംഘടനാ പ്രവര്‍ത്തകരും അണിനിരക്കണമെന്ന് ജില്ലാ കൗണ്‍സില്‍ യോഗം അഭ്യര്‍ഥിച്ചു.
അഡ്വ. ജെ വേണുഗോപാലന്‍ നായരുടെ അധ്യക്ഷതയില്‍ നടന്ന ജില്ലാ കൗണ്‍സില്‍ യോഗത്തില്‍ ജില്ലാ സെക്രട്ടറി അഡ്വ. ജി ആര്‍ അനില്‍ റിപ്പോര്‍ട്ട് അവതരിപ്പിച്ചു. ദേശീയ കൗണ്‍സില്‍ അംഗം സി ദിവാകരന്‍ എം.എല്‍.എ, സംസ്ഥാന എക്‌സിക്യൂട്ടീവ് അംഗം എന്‍ രാജന്‍, ജില്ലാ അസിസ്റ്റന്റ് സെക്രട്ടറി വി.പി ഉണ്ണികൃഷ്ണന്‍ തുടങ്ങിയവര്‍ സംസാരിച്ചു.