കണ്ണൂര്‍: രാഷ്ട്രീയ പ്രവര്‍ത്തന കാലഘട്ടത്തില്‍ സി.പി.എമ്മിന്റെ നിരന്തര പീഡനത്തിന്റെയും ഊരുവിലക്കിന്റെയും അനുഭവങ്ങള്‍ ഓര്‍ത്തെടുത്ത സതീശന്‍ പാച്ചേനിയുടെ പ്രസംഗം ഡി.സി.സി പ്രസിഡന്റ് പദമേറ്റെടുക്കല്‍ ചടങ്ങിനെ വികാര നിര്‍ഭരമാക്കി. കെ.എസ്.യുവില്‍ പ്രവര്‍ത്തനം തുടങ്ങി ജില്ലാതലത്തിലേക്കു പ്രവര്‍ത്തനം മാറ്റിയതോടെ നാട്ടില്‍ സി.പി.എം പ്രവര്‍ത്തകര്‍ എതിര്‍പ്പുമായി രംഗത്തുവന്നു തുടങ്ങി. സി.പി.എമ്മിന്റെ ശക്തികേന്ദ്രമായ പാച്ചേനിയെന്ന ഗ്രാമത്തിന്റെ പേര് സ്വന്തം പേരിനൊപ്പം ചേര്‍ക്കരുതെന്നായിരുന്നു ആദ്യത്തെ തിട്ടൂരം.
തന്റെ സതീശനെന്ന പേരിനൊപ്പം ഇനി മുതല്‍ പാച്ചേനിയെന്ന പേരുചേര്‍ക്കാന്‍ പാടില്ലെന്നും അങ്ങനെ വന്നാല്‍ തന്റെ കുടല്‍മാലയുടെ നീളം താനറിയുമെന്നായിരുന്നു ഒരു ലോക്കല്‍ കമ്മിറ്റിയംഗം പിടിച്ചുനിര്‍ത്തി ഭീഷണിപ്പെടുത്തിയത്. എന്നാല്‍ താന്‍ പേരിനൊപ്പമുള്ള പാച്ചേനിയെ മാറ്റിയില്ല, ഇപ്പോള്‍ 48 വയസായിട്ടും താന്‍ കുടല്‍മാലയുടെ നീളവും അറിഞ്ഞിട്ടില്ല. രാഷ്ട്രീയ പ്രവര്‍ത്തനം തുടങ്ങിയ കാലത്ത് കോണ്‍ഗ്രസ് പ്രവര്‍ത്തകനായതിന്റെ പേരില്‍ സി.പി.എം തനിക്കെതിരേ അപ്രഖ്യാപിത ഊരുവിലക്കും പ്രഖ്യാപിച്ചിരുന്നു. നാട്ടില്‍ നിന്നു കണ്ണൂരിലേക്കും മറ്റെവിടേക്കെങ്കിലും ബസില്‍ യാത്രചെയ്യുമ്പോള്‍ പലരും തന്റെ അടുത്ത് ഇരിക്കാറില്ല. കണ്ടാല്‍ പലരും മിണ്ടില്ല. ഇത്തരത്തില്‍ ഊരുവിലക്കിയും പീഡിപ്പിച്ചും സി.പി.എം തന്നെ കോണ്‍ഗ്രസില്‍ നിന്നും അകറ്റാന്‍ ശ്രമിക്കുംതോറും താന്‍ കോണ്‍ഗ്രസുമായി കൂടുതല്‍ അടുക്കുകയായിരുന്നുവെന്നും പാച്ചേനി ചൂണ്ടിക്കാട്ടി.