കൊല്ലം: സഹകരണ മേഖലയെ സംരക്ഷിക്കുന്നതിനും തെറ്റായ പ്രചാരണങ്ങളെ പ്രതിരോധിക്കുന്നതിനും ലക്ഷ്യമിട്ട് ഇന്നലെ നടത്തിയ സഹകരണ സംരക്ഷണ ദിനാചരണത്തിന് കൊല്ലം ജില്ലയില്‍ വന്‍ ജനപിന്തുണ. സര്‍വ്വീസ് സഹകരണ ബാങ്കുകളെ കൂടുതല്‍ ശക്തിപ്പെടുത്തുന്നതിനും എല്ലാ കുടുംബങ്ങളേയും സഹകരണ പ്രസ്ഥാനവുമായി അടുപ്പിക്കുന്നതിനുമുള്ള പ്രത്യേക പ്രചാരണ പരിപാടിക്കും ഇന്നലെ തുടക്കമായി. ജില്ലാതല ഉദ്ഘാടനം ഉമയനല്ലൂരില്‍ എം. നൗഷാദ് എം.എല്‍.എ നിര്‍വഹിച്ചു. ജില്ലാ പഞ്ചായത്തംഗം എസ്. ഫത്തഹുദ്ദീന്‍, എന്‍. എസ് .സഹകരണ ആശുപത്രി പ്രസിഡന്റ് എന്‍.മാധവന്‍ പിള്ള, പ്രമുഖ സഹകാരികളായ ബി.രാജേന്ദ്രന്‍, അമ്മിണിയമ്മ തുടങ്ങിയവര്‍ സംബന്ധിച്ചു.
എല്ലാ കേന്ദ്രങ്ങളിലും ആവേശകരമായ പ്രതികരണമാണ് ലഭിച്ചതെന്ന് എം. നൗഷാദ് എം.എല്‍.എ പറഞ്ഞു. ജില്ലയിലെമ്പാടും സഹകരണ ബാങ്കുകളുടെയും സഹകരണ സംഘങ്ങളുടെയും നേതൃത്വത്തില്‍ ഭവന സന്ദര്‍ശനം നടത്തി.
ഇന്‍ഫര്‍മേഷന്‍പബ്ലിക് റിലേഷന്‍സ് വകുപ്പിന്റെ സഹകരണത്തോടെയാണ് പരിപാടി സംഘടിപ്പിച്ചത്. ജനപ്രതിനിധികളും സഹകരണ സംഘങ്ങളുടെ ബോര്‍ഡ് അംഗങ്ങളും ജീവനക്കാരും അഭ്യുദയകാംക്ഷികളും കക്ഷിരാഷ്ട്രീയ ഭേദമെന്യെ പങ്കുചേര്‍ന്ന ഭവനസന്ദര്‍ശനത്തോടനുബന്ധിച്ച് നടത്തിയ നിക്ഷേപ സമാഹരണത്തില്‍ നിരവധി പേര്‍ പങ്കാളികളായി.