കോഴിക്കോട്: മലബാറിന്റെ ഫുട്‌ബോള്‍ സ്വപ്നങ്ങള്‍ ചിറക് നല്‍കാന്‍ കേരളത്തില്‍ നിന്ന് ഐ ലീഗ് ക്ലബ് വരുന്നു. മലപ്പുറം ആസ്ഥാനമായാണ് പുതി ക്ലബ് വരുന്നത്.
ഇത് മലബാറിലെ ഫുട്‌ബോളിന്റെ വളര്‍ച്ചക്ക് ഗുണകരമായേക്കും. ഗോകുലം ഗോപാലന്‍ പ്രസിഡന്റായുള്ള ഗോകുലം എഫ്.സിയാണ് മലപ്പുറം ആസ്ഥാനമായി പ്രവര്‍ത്തനമാരംഭിക്കുന്നത്.
ഐ. ലീഗ് രണ്ടാം ഡിവിഷന്‍ ഉള്‍പ്പെടെ രാജ്യത്തെ പ്രമുഖ ടൂര്‍ണമെന്റുകളിലെല്ലാം പങ്കെടുക്കാനാണ് ക്ലബിന്റെ തീരുമാനം. മലപ്പുറം സ്‌പോര്‍ട്‌സ് കൗണ്‍സില്‍ സ്റ്റേഡിയമാണ് ക്ലബിന്റെ ഹോം ഗ്രൗണ്ട്.
കേരളത്തിന് പുറമെ ഘാന, കെനിയ, ലൈബീരിയ, വടക്കു കിഴക്കന്‍ സംസ്ഥാനങ്ങള്‍ എന്നിവിടങ്ങളില്‍ നിന്നും കളിക്കാരെ തെരഞ്ഞെടുക്കുന്നുണ്ട്.
താരങ്ങള്‍ക്കായുള്ള സെലക്ഷന്‍ ട്രയല്‍സ് മലപ്പുറം കോട്ടപ്പടിയില്‍ തുടങ്ങി.
ഐ. ലീഗിലേക്ക് കേരളത്തില്‍ നിന്ന് ഒരു ടീം എത്തുന്നതോടെ ഇത് കേരളത്തിന്റെയും പ്രത്യേകിച്ച് മലബാറിലെയും ഫുട്‌ബോളിന് മുതല്‍കൂട്ടാകുമെന്നാണ് വിലയിരുത്തല്‍.