തളിപ്പറമ്പ്: അരക്കിലോ കഞ്ചാവുമായി കൂവോട് സ്വദേശിയെ തളിപ്പറമ്പ് എക്‌സൈസ് സംഘം പിടികൂടി. പൂവത്തിങ്കല്‍ വീട്ടില്‍ എല്‍ദോസ് പൗലോസി(32)നെയാണ് ഏഴാംമൈലില്‍ നിന്നു ബുധനാഴ്ച്ച വൈകുന്നേരം 6.30ഓടെ അറസ്റ്റ് ചെയ്തത്. കഴിഞ്ഞയാഴ്ച പിടിയിലായ ഒഡീഷ സ്വദേശി സല്‍മാന്‍ നായിക്കില്‍നിന്നും എല്‍ദോസിനെ കുറിച്ച് സൂചന ലഭിച്ചിരുന്നു. ഇയാളില്‍ നിന്നാണ് എല്‍ദോസ് കഞ്ചാവ് വാങ്ങിയത്. ഉദ്യോഗസ്ഥര്‍ ആവശ്യക്കാരനെന്ന നിലയില്‍ എല്‍ദോസിനെ സമീപിച്ച് കെണിയിലാക്കുകയായിരുന്നു. കോതമംഗലം സ്വദേശിയായ എല്‍ദോസ് ഏറെക്കാലമായി കൂവോട് വാടകയ്ക്ക് താമസിച്ചു വരികയാണ്. കൂലിപ്പണിക്കാരനായ ഇയാള്‍ കഞ്ചാവ് വില്‍പ്പന തുടങ്ങിയിട്ട് ഏറെനാളായില്ല എന്ന് എക്‌സൈസ് സംഘത്തോടു പറഞ്ഞു. ഒരു മാസത്തിനിടെ തളിപ്പറമ്പില്‍ നടക്കുന്ന മൂന്നാമത്തെ കഞ്ചാവ് വേട്ടയാണിത്. സി.ഐ കെ.കെ ദിനേശിന്റെ നേതൃത്വത്തില്‍ പ്രിവന്റീവ് ഓഫിസര്‍ പി.ആര്‍ സജീവ്, സിവില്‍ എക്‌സൈസ് ഓഫിസര്‍മാരായ വി.കെ വിനോദ്, കെ.വി ഷാജു, പി.പി മനോഹരന്‍, എം ഗോവിന്ദന്‍, ഡ്രൈവര്‍ കെ.വി പുരുഷോത്തമന്‍ എന്നിവര്‍ സംഘത്തിലുണ്ടായി. പ്രതിയെ തളിപ്പറമ്പ് ജുഡീഷ്യല്‍ കോടതി റിമാന്‍ഡ് ചെയ്തു.