ഹരിപ്പാട്: കേരള യൂനിവേഴ്‌സിറ്റിയുടെ 2016-17 വര്‍ഷത്തില്‍ എം എസ് സി ഫിസിക്‌സ് പരീക്ഷയില്‍ ഹരിപ്പാട് സ്വദേശിനി ആര്‍.ഫാത്തിമയ്ക്ക് ഒന്നാം റാങ്കിന്റെ തിളക്കം. ഫാത്തിമ കായംകുളം എം.എസ്.എം കോളേജിന്റെ അഭിമാനമായി.
ആലപ്പുഴ ജില്ലാ കോടതി ഫെയര്‍ കോപ്പി സൂപ്രണ്ട് കുമാരപുരം പൊത്തപ്പള്ളി വടക്ക് സിമി മന്‍സിലില്‍ എച്ച്.താഹയുടേയും പൊത്തപ്പള്ളി ഗവ.എല്‍.പി സ്‌കൂള്‍ അധ്യാപിക റഷീദയുടേയും മകളാണ് ഈ കൊച്ചു മിടുക്കി. ഏക സഹോദരന്‍ ഫാസില്‍ കൊല്ലം ടി.കെ.എം.എം, എഞ്ചിനീയറിംഗ് കോളേജിലെ ഒന്നാം വര്‍ഷ വിദ്യാര്‍ത്ഥിയാണ്.
ചെറിയ ക്ലാസ്സുകള്‍ മുതല്‍ നല്ല മാര്‍ക്കു വാങ്ങി മികവ് തെളിയിച്ച ഫാത്തിമ ഏവരുടെയും പ്രശംസ പിടിച്ചു പറ്റിയിരുന്നു. എല്‍.പി തലം മുതല്‍ മലയാളം മീഡിയത്തില്‍ പഠിച്ചു വന്ന ഫാത്തിമ ഹൈസ്‌ക്കൂള്‍ തലത്തിലും ഹയര്‍ സെക്കണ്ടറി തലത്തിലും ഹരിപ്പാട് ഗവ.ഗേള്‍സ് ഹയര്‍ സെക്കണ്ടറി സ്‌കൂളിലാണ് പഠിച്ചത്.
ബി എസ് സിക്ക് ആലപ്പുഴ സെന്റ് ജോസഫ്‌സ് കോളേജില്‍ പഠിയ്ക്കുമ്പോഴും ഫിസിക്‌സില്‍ ഒന്നാം റാങ്ക് ഫാത്തിമയ്ക്കായിരുന്നു.
പാഠ്യ-പാഠ്യേ തര പ്രവര്‍ത്തനങ്ങളിലും കഴിവ് തെളിയിച്ചിട്ടുണ്ട് ഈ മിടുക്കി. കഥാരചന കവിതാ രചന എന്നിവയ്ക്ക് ജില്ലാതലത്തിലും സംസ്ഥാന തലത്തിലും പങ്കെടുത്ത് നിരവധി സമ്മാനങ്ങള്‍ നേടിയിട്ടുണ്ട്.
വായനയാണ് പ്രധാന ഹോബി.കഥയും നോവലുകളുമാണ് പ്രധാനമായും വായിയ്ക്കുന്നത്.
നെറ്റ് പാസായതിന് ശേഷം ഫിസ്‌ക്‌സില്‍ ഡോക്ടറേറ്റ് എടുക്കുവാനാണ് തന്റെ ശ്രമമെന്നും ഫാത്തിമ പറഞ്ഞു.