ഇടവെട്ടി: ഇടവെട്ടി ഗ്രാമപഞ്ചായത്ത് വൈസ് പ്രസിഡന്റായി യു.ഡി.എഫിലെ മുസ്‌ലിംലീഗ് പ്രതിനിധി ഷീജ നൗഷാദ് തെരഞ്ഞെടുക്കപ്പെട്ടു. യു.ഡി.എഫ് ധാരണ പ്രകാരം കേരള കോണ്‍ഗ്രസിലെ (എം) ബീന വിനോദ് രാജിവെച്ചതിനെ തുടര്‍ന്നാണ് വൈസ് പ്രസിഡന്റ് സ്ഥാനത്തേക്ക് തെരഞ്ഞെടുപ്പ് നടന്നത്.
വൈസ് പ്രസിഡന്റ് തെരഞ്ഞെടുപ്പില്‍ ഷീജ നൗഷാദിന്റെ പേര് കോണ്‍ഗ്രസിലെ അശ്വതി .ആര്‍ .നായര്‍ നിര്‍ദ്ദേശിക്കുകയും മുന്‍ വൈസ് പ്രസിഡന്റും കേരള കോണ്‍ഗ്രസ് പ്രതിനിധിയുമായ ബീന വിനോദ് പിന്താങ്ങുകയും ചെയ്തു. നാലിനെതിരെ എട്ട് വോട്ടുകള്‍ നേടിയാണ് ഷീജ വിജയിച്ചത്. എല്‍.ഡി.എഫ് സ്ഥാനാര്‍ഥിയായി ഷീലാ ദീപുവാണ് (സി.പി.എം) മത്സരിച്ചത്.
റിട്ടേണിങ് ഓഫീസറായ താലൂക്ക് വ്യവസായ ഓഫീസര്‍ തെരഞ്ഞെടുപ്പ് നിയന്ത്രിച്ചു. ഷീജ നൗഷാദിനെ അനുമോദിച്ച് ഗ്രാമപഞ്ചാത്ത് പ്രസിഡന്റ് ലത്തീഫ് മുഹമ്മദ്, ഗ്രാമപഞ്ചായത്ത് അംഗം എ. കെ സുഭാഷ് കുമാര്‍, അന്‍ഷാദ്, സിബി ജോസ്, വി .എസ് അബ്ബാസ് (ആര്‍ എസ് പി), പഞ്ചായത്ത് മുസ്‌ലിംലീഗ് പ്രസിഡന്റ് അസീസ് ഇല്ലിക്കല്‍, ജന. സെക്രട്ടറി അമീര്‍ വാണിയപ്പുരയില്‍, കേരള യൂത്ത് ഫ്രണ്ട് (എം) സംസ്ഥാന ജന. സെക്രട്ടറി ജയകൃഷ്ണന്‍ പുതിയേടത്ത് എന്നിവര്‍ സംസാരിച്ചു.
ഇടവെട്ടിയിലെയും പരിസര പ്രദേശങ്ങളിലെയും രൂക്ഷമായ കുടിവെള്ള ക്ഷാമം പരിഹരിക്കാന്‍ എം. വി .ഐ. പി കനാല്‍വഴി ജലം തുറന്നുവിടാന്‍ അധികൃതര്‍ തയ്യാറാകണമെന്നും ഇതിനായി അധികൃതര്‍ക്ക് നിവേദനം നല്‍കുമെന്നും സ്വീകരണത്തിന് നന്ദി പറഞ്ഞ് ഷീജ നൗഷാദ് അറിയിച്ചു.