ചേളാരി: ജനുവരി ഒന്ന് ഞായറാഴ്ച സമസ്ത പ്രാര്‍ഥനാ ദിനമായി ആചരിക്കുന്നു. എല്ലാ വര്‍ഷവും റബീഉല്‍ ആഖിര്‍ ആദ്യത്തെ ഞായറാഴ്ച സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് പ്രാര്‍ഥനാദിനമായി ആചരിക്കാന്‍ തീരുമാനിച്ച പശ്ചാത്തലത്തിലാണ് ഞായറാഴ്ച പ്രത്യേക ചടങ്ങുകള്‍ സംഘിടിപ്പിച്ചിട്ടുള്ളത്.
പള്ളി മദ്‌റസകള്‍ സ്ഥാപിച്ചും ദീനീപ്രവര്‍ത്തനങ്ങള്‍ നടത്തിയും അവിശ്രമം പ്രവര്‍ത്തിച്ചു മണ്‍മറഞ്ഞുപോയ മഹാത്മാക്കളെയും പ്രവര്‍ത്തകരെയും സ്മരിച്ചും, റോഹിംഗ്യന്‍ മുസ്‌ലിംകള്‍ ഉള്‍പ്പെടെയുള്ള മര്‍ദ്ദിത ജനതക്ക് വേണ്ടി പ്രാര്‍ഥിച്ചും കൊണ്ടുള്ള പ്രത്യേക ചടങ്ങുകളാണ് ഈ ദിനത്തില്‍ നടക്കുക.
സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിന്റെ പതിനായിരത്തോളം വരുന്ന മദ്‌റസകള്‍ കേന്ദ്രീകരിച്ച് നടക്കുന്ന പ്രാര്‍ഥനാ ചടങ്ങില്‍ ഉലമാക്കള്‍, ഉമറാക്കള്‍, കമ്മിറ്റി ഭാരവാഹികള്‍, രക്ഷിതാക്കള്‍, വിദ്യാര്‍ഥികള്‍ എന്നിവര്‍ പങ്കെടുക്കും.
പ്രാര്‍ഥനാദിന ചടങ്ങുകള്‍ വിജയിപ്പിക്കാന്‍ സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് പ്രസിഡന്റ് പി.കെ.പി. അബ്ദുസ്സലാം മുസ്‌ലിയാര്‍ ബന്ധപ്പെട്ടവരോട് അഭ്യര്‍ഥിച്ചു.