തിരുവനന്തപുരം: നോട്ട് നിരോധനം മൂലം ജനങ്ങള്‍ക്കുണ്ടായ ദുരിതം മനസ്സിലാക്കാന്‍ ഹിതപരിശോധന നടത്താന്‍ കേന്ദ്ര സര്‍ക്കാര്‍ തയാറാകണമെന്ന് പ്രതിപക്ഷനേതാവ് രമേശ് ചെന്നിത്തല. 50 ദിവസംകൊണ്ട് നോട്ട് പ്രതിസന്ധി പരിഹരിക്കുമെന്ന വാക്കു പാലിക്കാത്ത പ്രധാനമന്ത്രി നരേന്ദ്രമോദിക്ക് അധികാരത്തില്‍ തുടരാന്‍ അവകാശമില്ലെന്നും ചെന്നിത്തല വാര്‍ത്താസമ്മേളനത്തില്‍ പറഞ്ഞു.
50 ദിവസം കഴിഞ്ഞ് പ്രതിസന്ധി പരിഹരിക്കപ്പെടുന്നില്ലെങ്കില്‍ തന്നെ തൂക്കിലേറ്റൂ എന്നാണ് മോദി പറഞ്ഞത്. എന്നാല്‍ ദുരിതം തുടരുകയാണ്. ഈ സാഹചര്യത്തില്‍ മോദി രാജിവയ്ക്കുകയാണ് വേണ്ടത്. ഭരണാധികാരിക്കു വിഡ്ഡിത്തം പറ്റിയാല്‍ അനുഭവിക്കുന്നത് ജനങ്ങളാണ്. കള്ളപ്പണം പിടിച്ചെടുക്കാനായില്ലെന്നു മാത്രമല്ല ജനങ്ങള്‍ ദുരിതത്തിലുമായി.
പ്രധാനമന്ത്രിയുടെയും റിസര്‍വ് ബാങ്കിന്റെയും വിശ്വാസ്യത നഷ്ടപ്പെട്ടിരിക്കയാണ്. നാളെ എന്തു ചെയ്യണമെന്നറിയാതെ കുഴങ്ങുകയാണ് റിസര്‍വ് ബാങ്ക്. പ്രതിസന്ധി മറികടക്കാന്‍ സംസ്ഥാന സര്‍ക്കാര്‍ ചെയ്യേണ്ടതൊന്നും ചെയ്യുന്നില്ല. ധനമന്ത്രിയെക്കുറിച്ച് ഒന്നും പറയുന്നില്ല.
പറഞ്ഞാല്‍ അദ്ദേഹം പറയും കോണ്‍ഗ്രസ് ബി.ജെ.പിയുടെ ബി ടീമാണെന്ന്. ഇപ്പോള്‍ അദ്ദേഹം ആയുര്‍വേദ ചികിത്സയിലാണ്. സര്‍ക്കാരും അദ്ദേഹത്തെപ്പോലെ എണ്ണത്തോണിയിലാണ്.
കേരളത്തിന്റെ അഭിമാനമായ എം.ടി വാസുദേവന്‍നായര്‍ക്കെതിരേ ബി.ജെ.പിയുടെ ഭാഗത്തുനിന്നുണ്ടായ പരാമര്‍ശങ്ങള്‍ സാംസ്‌കാരിക ഫാസിസമാണ്. സാംസ്‌കാരിക നായകര്‍ എന്തു പറയണമെന്ന് തീരുമാനിക്കേണ്ടത് ബി.ജെ.പിയല്ലെന്നും ചെന്നിത്തല പറഞ്ഞു.
കേന്ദ്ര, സംസ്ഥാന സര്‍ക്കാരുകളുടെ ജനദ്രോഹ നയങ്ങള്‍ക്കെതിരേ സമരം ശക്തമാക്കണമെന്ന് കോണ്‍ഗ്രസില്‍ ആരു പറയുന്നതും സ്വാഗതാര്‍ഹമാണ്. സമരം ശക്തമാക്കണമെന്ന ആഗ്രഹത്തിന്റെ പ്രതിഫലനമാണ് കെ. മുരളീധരന്റെ പ്രസ്താവനയെന്നും അദ്ദേഹം പറഞ്ഞു.