പറവൂര്‍: ഇരുപത്തൊമ്പതാമത് റവന്യൂ ജില്ലാ സ്‌കൂള്‍ കലോത്സവത്തിനുള്ള വേദികളുടെ നിര്‍മാണങ്ങളും മറ്റ് ഒരുക്കങ്ങളും ധ്രുതഗതിയില്‍ പുരോഗമിക്കുന്നു. പ്രധാന വേദിയായ പറവൂര്‍ ഗവണ്‍മെന്റ് ഗേള്‍സ് ഹയര്‍സെക്കന്‍ഡറി സ്‌കൂള്‍ ഉള്‍പ്പടെ പറവുര്‍ നഗരത്തിലെ പ്രമുഖ സ്‌കൂളുകളും മറ്റ് ചില സ്ഥാപനങ്ങളുമായി ബന്ധപ്പെട്ട ഹാളുകള്‍ ഉള്‍പ്പെടെ പതിനാറ് വേദികളിലായിട്ടാണ് ജനുവരി മൂന്ന്, നാല്, അഞ്ച്, ആറ് തീയതികളിലായി നടക്കുന്ന കലോത്സവം അരങ്ങേറുന്നത്. ഇക്കുറി മുന്‍ വര്‍ഷത്തേക്കാള്‍ കൂടുതല്‍ വിദ്യാര്‍ത്ഥികള്‍ മത്സര രംഗത്തുണ്ട്. ആകെ 11500 പേര്‍ രജിസ്റ്റര്‍ ചെയ്തിട്ടുണ്ട്.
മത്സരങ്ങള്‍ നടക്കുന്ന വിവിധ വേദികള്‍ക്ക് പറവൂരിലെ കലാ സാംസ്‌ക്കാരിക രംഗത്ത് പ്രവര്‍ത്തിച്ചു മണ്‍മറഞ്ഞവരുടെ പേരുകള്‍ നല്‍കാനാണ് സംഘാടകരുടെ തീരുമാനം. മുഖ്യ വേദിയായ ഗവണ്‍മെന്റ് ഗേള്‍സ് ഹയര്‍ സെക്കന്‍ഡറി സ്‌ക്കൂളില്‍ മാത്രം 4500 സ്‌ക്വയര്‍ ഫീറ്റിലാണ് പന്തല്‍ നിര്‍മിച്ചിരിക്കുന്നത്. മറ്റു പ്രമുഖ സ്‌കൂളുകളായ പറവുര്‍ ഗവ. ബോയ്‌സ് സ്‌കൂള്‍, പുല്ലംകുളം ശ്രീ നാരായണ ഹയര്‍ സെക്കന്ററി സ്‌കൂള്‍, സമുഹം ഹൈസ്‌കൂള്‍ തുടങ്ങിയ പതിനാറ് വേദികളിലായി 24000 സ്‌ക്വയര്‍ ഫീറ്റ് പന്തലുകളാണ് നിര്‍മിക്കുന്നത്.
പരിസ്ഥിതി സൗഹൃദ പശ്ചാത്തലത്തില്‍ പൂര്‍ണമായും ഹരിത കലോത്സവമാക്കാനാണ് സംഘാടകര്‍ ശ്രമിക്കുന്നത്. കലാകാരന്മാര്‍ തുണിയില്‍ തയ്യാറാക്കിയ ബാനറുകളും ബോര്‍ഡുകളും കമാനങ്ങളും നിരന്നു കഴിഞ്ഞു.