തിരുവനന്തപുരം: തിരുവനന്തപുരം മുതല്‍ കണ്ണൂര്‍ വരെ നീളുന്ന അതിവേഗ റെയില്‍പാത തുടങ്ങാനുള്ള സാധ്യത തെളിയുന്നു. അതിവേഗ റെയില്‍പാത ഉഡുപ്പി വരെ നീട്ടുന്നതിന് റെയില്‍വേയോട് സഹായം തേടാന്‍ കഴിഞ്ഞദിവസം തലസ്ഥാനത്തു ചേര്‍ന്ന ദക്ഷിണേന്ത്യന്‍ ആഭ്യന്തര മന്ത്രിമാരുടെ യോഗം തീരുമാനിച്ചിരുന്നു. ഇതു ശുഭ സൂചനയായാണ് കേരള ഹൈസ്പീഡ് റെയില്‍ കോര്‍പറേഷന്‍ വിലയിരുത്തുന്നത്.
ജപ്പാന്‍ ധനസഹായത്തോടെ നടപ്പാക്കുന്ന അഹമ്മദാബാദ്- മുംബൈ അതിവേഗ റെയില്‍പാതയുടെ നിര്‍മാണത്തിന് അനുമതി ലഭിച്ചിട്ടുണ്ട്. ഈ സാഹചര്യത്തില്‍ സാധ്യതാ പഠനവും സര്‍വേയും പൂര്‍ത്തിയാക്കിയ തിരുവനന്തപുരം- കണ്ണൂര്‍ പാതയ്ക്ക് ഈ വര്‍ഷം തന്നെ അനുമതി ലഭിക്കുമെന്നാണ് കോര്‍പറേഷന്‍ അധികൃതര്‍ കരുതുന്നത്. ഇതു സംബന്ധിച്ച പ്രഖ്യാപനം കേന്ദ്ര ബജറ്റില്‍ ഉണ്ടാകുമെന്നാണ് പ്രതീക്ഷ. നോട്ട് പിന്‍വലിക്കല്‍ മൂലം ബാങ്കുകളിലെ നിക്ഷേപങ്ങളില്‍ ഗണ്യമായ വര്‍ധന ഉണ്ടായ സാഹചര്യത്തില്‍ വന്‍കിട പദ്ധതികള്‍ക്ക് കേന്ദ്ര സര്‍ക്കാര്‍ അനുമതി നല്‍കുമെന്ന പ്രതീക്ഷയും സംസ്ഥാന സര്‍ക്കാരിനും കോര്‍പറേഷനുമുണ്ട്.
പാതയ്ക്ക് അനുമതി ലഭിച്ചാല്‍ ഒമ്പതു വര്‍ഷം കൊണ്ട് പണിപൂര്‍ത്തിയാക്കാനാവുമെന്നാണ് പ്രതീക്ഷ. കേന്ദ്ര, സംസ്ഥാന സര്‍ക്കാരുകള്‍ സംയുക്തമായി രൂപം കൊടുക്കുന്ന സ്‌പെഷ്യല്‍ പര്‍പ്പസ് വെഹിക്കിള്‍ രൂപീകരിച്ചാവും പദ്ധതി നടപ്പാക്കുക.
ഏതാണ്ട് 1,27,000 കോടി രൂപ ചെലവു പ്രതീക്ഷിക്കുന്ന പദ്ധതിയാണിത്. പദ്ധതി നടപ്പാക്കുമ്പോഴുണ്ടാകുന്ന നികുതികള്‍ കേന്ദ്ര, സംസ്ഥാന സര്‍ക്കാരുകള്‍ ഒഴിവാക്കിയാല്‍ ഏതാണ്ട് 6,000 കോടി പദ്ധതി ചെലവില്‍ നിന്ന് കുറയ്ക്കാനാവും. വായ്പയ്ക്കായി ജപ്പാന്‍ ഇന്റര്‍നാഷനല്‍ കോര്‍പറേഷന്‍ ഏജന്‍സിയുമായി പ്രാഥമിക ചര്‍ച്ചകള്‍ പൂര്‍ത്തിയായി വരികയാണ്.