മാന്നാര്‍(ആലപ്പുഴ): നാട്ടിലേക്ക് അവധിക്കു യാത്രതിരിച്ച സൈനികനെ ട്രെയിനില്‍ നിന്നു കാണാതായതായി പരാതി. മാന്നാര്‍ കുട്ടംപേരൂര്‍ നല്ലവീട്ടില്‍ കിഴക്കേതില്‍ സുരേഷ്‌കുമാറി(44)നെയാണു കാണാതായത്. അര്‍ധസൈനിക വിഭാഗത്തില്‍ ഡ്രൈവറായി ജോലിചെയ്തു വരികയായിരുന്ന സുരേഷ്‌കുമാര്‍ അവധി ലഭിച്ചതിനെ തുടര്‍ന്ന് കഴിഞ്ഞ 15നാണ് നാട്ടിലേക്കു യാത്രതിരിച്ചത്. സുഹൃത്തായ കായംകുളം സ്വദേശിക്കൊപ്പം റങ്കിയാ-ഗോഹട്ടി-ബംഗളൂരു എക്‌സ്പ്രസില്‍ യാത്ര ചെയ്യവേ ചെന്നൈയില്‍ വച്ച് കാണാതായെന്നാണു വീട്ടുകാര്‍ക്കു സുഹൃത്ത് നല്‍കിയ വിവരം.
   സൈനികന്റെ ബാഗും മറ്റു സാധനങ്ങളും സുഹൃത്ത് വീട്ടുകാരെ ഏല്‍പ്പിക്കുകയും ചെയ്തു. സുഹൃത്ത് ട്രെയിനില്‍ ഉറക്കമായിരുന്നുവെന്നും കോയമ്പത്തൂരിനു സമീപം വച്ച് ഉണര്‍ന്നപ്പോള്‍ കൂടെയുണ്ടായിരുന്നയാള്‍ ചെന്നൈയില്‍ ഇറങ്ങിപ്പോയെന്നു സഹയാത്രികര്‍ പറഞ്ഞതായും പരാതിയില്‍ പറയുന്നു. ഇതു സംബന്ധിച്ചു സുരേഷിന്റെ മാതാവ് തങ്കമ്മയും ഭാര്യ ബിന്ദുവും മാന്നാര്‍ പൊലിസിലും കോട്ടയം റെയില്‍വേ പൊലിസിലും പരാതി നല്‍കി. റെയില്‍വേ പൊലിസ് അന്വേഷണം ആരംഭിച്ചിട്ടുണ്ട്.