വടക്കാഞ്ചേരി: ക്ഷീര വിപ്ലവത്തില്‍ പുതിയൊരു വിജയഗാഥ രചിച്ച് മിണാലൂര്‍ പറങ്ങനാട്ട് കൃഷ്ണനും, കുടുംബവും അറുപത്കാരനായ കൃഷ്ണനിത് കാര്‍ഷിക സംസ്‌കൃതിയുടെ സംരക്ഷണ പാതയിലുള്ള നിലക്കാത്ത സഞ്ചാരം കൂടിയാണ്. കൃഷ്ണന്‍ കാര്‍ഷിക മുന്നേറ്റത്തിന്റെ വക്താവാകാന്‍ തുടങ്ങിയിട്ട് വര്‍ഷങ്ങളേറെയായി. നെല്‍ കൃഷിയിലൂടെയായിരുന്നു തുടക്കം. മണ്ണില്‍ പൊന്നുവിളയിച്ചു ഏറെ കാലം. ഒടുവില്‍ നെല്‍പാടങ്ങളെല്ലാം കോണ്‍ക്രീറ്റ് കാടുകളാവുകയും, പാടശേഖരങ്ങള്‍ ഓര്‍മയാവുകയും ചെയ്തതോടെ കൃഷ്ണന്‍ പതിയെ പശുവളര്‍ത്തലിലേക്ക് മാറുകയായിരുന്നു. ഇന്ന് ജേഴ്‌സി, സിന്ധി ഇനങ്ങളിലായി 18 പശുക്കളുണ്ട് കൃഷ്ണന്റെ തൊഴുത്തില്‍. ഭാര്യ വിജയ മകന്‍ രാഹുല്‍ എന്നിവരും ഈ വയോധികന്റെ സഹായത്തിനുണ്ട്. പശുക്കള്‍ക്ക് പേരിടുന്നതിലും, വൈവിധ്യം കാത്ത് സൂക്ഷിക്കുകയാണ് കൃഷ്ണന്‍. ഭവാനി, റോസിലി, സൈനബ ഇങ്ങനെ പോകുന്നു പേരുകള്‍. ആറ് വയസുള്ള ഭവാനിയാണ് പശു സംഘത്തിലെ മുതിര്‍ന്നവള്‍ വലിയ തൊഴുത്തില്‍ ആഢംബര ജീവിതമാണ് പശുക്കള്‍ക്ക്. സദാസമയവും തൊഴുത്തില്‍ നിന്ന് വിവിധ ഭാഷകളിലുള്ള പാട്ടുകള്‍ ഉയരും. നാടന്‍പുല്ലും, സമീകൃതാഹാരവും ധാരാളം. പ്രതിദിനം 60 ലിറ്റര്‍ പാലാണ് കറന്നെടുക്കുന്നത്. പൂര്‍ണമായും യന്ത്ര സഹായത്തോടെയാണ് പാല്‍ കറക്കല്‍. മകന്‍ രാഹുലാണ് വില്‍പനകാരന്‍. ബൈക്കുകളില്‍ വീടുകളിലെത്തിച്ച് നല്‍കും. പശു മൂത്രവും, ചാണകവും ശാസ്ത്രീയമായി ഉപയോഗിക്കുന്നു. ഭീമന്‍ ബയോഗ്യാസ് പ്ലാന്റ് നിര്‍മിച്ച് ഊര്‍ജ സംരക്ഷണത്തിന് തന്നെ കൊണ്ട് ചെയ്യാവുന്ന സംഭാവനകള്‍ നല്‍കുന്നു. മൂന്ന് പെണ്‍മക്കളെ കെട്ടിച്ചയച്ചതും, ബുദ്ധിമുട്ടുകളില്ലാതെ കുടുംബ ജീവിതം നയിക്കുന്നതും ഇതുകൊണ്ടാണെന്ന് കൃഷ്ണന്‍ പറയുന്നു.