അമ്പലവയല്‍: ദേശീയ തൊഴിലുറപ്പ് പദ്ധതിയിലുള്‍പ്പെടുത്തി അമ്പലവയല്‍ ഗ്രാമപഞ്ചായത്തിലെ 10-ാം വാര്‍ഡിലെ കോട്ടൂര്‍ പുഴ ശുചീകരിച്ചു. അമ്പലവയല്‍ ഗ്രാമപഞ്ചായത്തിലെ 10-ാം വാര്‍ഡിലെ കോട്ടൂര്‍ പുഴയിലെ വെള്ളമാണ് അമ്പലവയല്‍ ഗ്രാമ പഞ്ചായത്തിലെ 65 ശതമാനത്തോളം ജനങ്ങള്‍ ഉപയോഗിക്കുന്നത്.
പ്ലാസിറ്റിക് ഉള്‍പെടെയുള്ള മാലിന്യങ്ങള്‍ നിറഞ്ഞ പുഴ വൃത്തിയാക്കാന്‍ പഞ്ചായത്തംഗം ജയപ്രവീണിന്റെ നേതൃത്വത്തില്‍ പ്രവര്‍ത്തനം നടന്നിരുന്നെങ്കിലും മാലിന്യങ്ങള്‍ മുഴുവനായി നീക്കാന്‍ കഴിഞ്ഞിരുന്നില്ല. തുടര്‍ന്നാണ് പുഴ ശുചീകരണം തൊഴിലുറപ്പ് പദ്ധതിയിലുള്‍പ്പെടുത്തിയത്.
ഈ കുടിവെള്ള സ്രോതസ്സ് വൃത്തിയാക്കി സൂക്ഷിക്കേണ്ടത് പഞ്ചായത്തിന്റെയും ജനങ്ങളുടെയും കടമയാണെന്ന് പഞ്ചായത്ത് പ്രസിഡന്റ് സീത വിജയന്‍ അഭിപ്രായപ്പെട്ടു. പുഴയുടെ അരികുകളില്‍ ബോര്‍ഡ് സ്ഥാപിക്കാനും യോഗം തീരുമാനിച്ചിട്ടുണ്ട്. എം.വി ജോര്‍ജ്ജ് അധ്യക്ഷനായി. വാര്‍ഡംഗം ജയപ്രവീണിന്റെ നേതൃത്വത്തില്‍ കോട്ടൂര്‍ പുഴ സംരക്ഷണ സമിതിക്ക് രൂപം നല്‍കുകയും ചെയ്തു.