കോഴിക്കോട്: സൗത്ത് സോണ്‍ സന്തോഷ് ട്രോഫി യോഗ്യതാ മത്സത്തില്‍ ബി ഗ്രൂപ്പില്‍ നിന്നു സര്‍വിസസ് യോഗ്യത നേടി. തമിഴ്‌നാടിനെ കീഴടക്കിയാണ് നിലവിലെ ചാംപ്യന്‍മാരായ സര്‍വിസസ് മുന്നേറിയത്. ആദ്യ മത്സരത്തില്‍ തെലങ്കാനയെ ഒരു ഗോളിനു തോല്‍പിച്ച് ലക്ഷദ്വീപ് കന്നി സന്തോഷ് ട്രോഫി അവിസ്മരണീയമാക്കി.
യോഗ്യതാ നേടാന്‍ സമനിലയെങ്കിലും വേണ്ടിയിരുന്ന സര്‍വിസസ് ഒന്നിനെതിരേ രണ്ടു ഗോളുകള്‍ക്കാണ് പൊരുതിക്കളിച്ച തമിഴ്‌നാടിനെ പരാജയപ്പെടുത്തിയത്. കളിയുടെ 32ാം മിനുട്ടില്‍ മിഡ്ഫീല്‍ഡര്‍ ജാക്‌സന്‍ ദാസിന്റെ വകയായിരുന്നു തമിഴ്‌നാടിന്റെ ഗോള്‍. ഗോള്‍ നേടിയതോടെ ഉണര്‍ന്നു കളിച്ച തമിഴ്‌നാടിനു നിരവധി തവണ മികച്ച അവസരങ്ങള്‍ ലഭിച്ചെങ്കിലും മുതലാക്കാനായില്ല. ആദ്യ രണ്ടു പോരിലും അനായാസം കളിച്ച സര്‍വിസസിനു തമിഴ്‌നാട് വെല്ലു വിളി ഉയര്‍ത്തി.
രണ്ടാം പകുതിയുടെ തുടക്കത്തില്‍ സര്‍വിസസ് താരം അര്‍ജുന്‍ ടുഡുവിന്റെ ലോങ് റേഞ്ചര്‍ തമിഴ്‌നാട് ഗോള്‍ കീപ്പര്‍ മണികണ്ഠനെ കാഴ്ചക്കാരനാക്കി പോസ്റ്റില്‍ കയറി. 71ാം തമിഴ്‌നാട് പ്രധിരോധ താരം ഷിനുവിന്റെ പിഴവില്‍ നിന്നു ലഭിച്ച പെനാല്‍റ്റി ബ്രിട്ടോ കൃത്യമായി പോസ്റ്റിലെത്തിച്ചു. ലീഡുയര്‍ത്താന്‍ വേണ്ടി തമിഴ്‌നാട് താരങ്ങള്‍ കളം നിറഞ്ഞ് കളിച്ചെങ്കിലും ഗോളൊന്നും നേടാനായില്ല. ഇതോടെ സര്‍വിസസ് ഫൈനല്‍ റൗണ്ടിലേക്ക് യോഗ്യത നേടുകയായിരുന്നു.
ആദ്യ മത്സരത്തില്‍ ലക്ഷദ്വീപ് തെലങ്കാനയെ ഏകപക്ഷീയമായ ഒരു ഗോളിനു തോല്‍പിച്ചു. തെലങ്കാന ഭേദപ്പെട്ട പ്രകടനം കാഴ്ചവച്ചെങ്കിലും ഗോളൊന്നും നേടാനായില്ല.
54ാം മിനുട്ടില്‍ ലഭിച്ച കോര്‍ണര്‍ കിക്കില്‍ നിന്നു മിഡ്ഫീല്‍ഡര്‍ കെ. പി ഉമ്മറിന്റെ വകയായിരുന്നു ലക്ഷദ്വീപിന്റെ കന്നി ഗോള്‍. ഗ്രൂപ്പ് ബിയില്‍ നിന്നു തമിഴ്‌നാട്, തെലങ്കാന, ലക്ഷദ്വീപ് എന്നിവര്‍ പുറത്തായി.