ചെമ്മാട്:  ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി ഡിപ്പാര്‍ട്ട്‌മെന്റ് ഓഫ് ഖുര്‍ആന്‍ ആന്‍ഡ് റിലേറ്റഡ് സയന്‍സിന് കീഴില്‍ നടക്കുന്ന ദ്വിദിന അന്താരാഷ്ട്ര ഖുര്‍ആന്‍ കോണ്‍ഫറന്‍സിന് നാളെ ദാറുല്‍ ഹുദായില്‍ തുടക്കമാകും.
ഇന്ത്യയിലെ ഖുര്‍ആന്‍ വിവര്‍ത്തനം; പ്രായോഗികത, വൈവിധ്യം, സമൂഹം എന്ന പ്രമേയത്തിലാണ് കോണ്‍ഫറന്‍സ്.
ഇന്റര്‍നാഷനല്‍ ഇസ്‌ലാമിക് യൂനിവേഴ്‌സിറ്റി മലേഷ്യ, ജവഹര്‍ലാല്‍ നെഹ്‌റു യൂനിവേഴ്‌സിറ്റി, അലിഗഢ് മുസ്‌ലിം യൂനിവേഴ്‌സിറ്റി, ജാമിഅ മില്ലിയ്യ ഡല്‍ഹി, കശ്മിര്‍ യൂനിവേഴ്‌സിറ്റി, കാലിക്കറ്റ് യൂനിവേഴ്‌സിറ്റി, ജാമിഅ മര്‍കസ് വളാഞ്ചേരി തുടങ്ങിയ ദേശീയ അന്തര്‍ദേശീയ സര്‍വകലാശാലകളില്‍ നിന്ന് അന്‍പതോളം പ്രൊഫസര്‍മാര്‍, ഗവേഷക വിദ്യാര്‍ഥികള്‍ പ്രബന്ധങ്ങള്‍ അവതരിപ്പിക്കും. ശനിയാഴ്ച നടക്കുന്ന ഉദ്ഘാടന സെഷന്‍ മലേഷ്യന്‍ ഇന്റര്‍നാഷനല്‍ ഇസ്‌ലാമിക് യൂനിവേഴ്‌സിറ്റി ഖുര്‍ ആന്‍ വിഭാഗം  തലവന്‍ ഡോ. ഇസ്‌റാര്‍ അഹ്മദ് ഖാന്‍ ഉദ്ഘാടനം ചെയ്യും.
പാണക്കാട് സയ്യിദ് മുനവ്വറലി ശിഹാബ് തങ്ങള്‍ മുഖ്യാതിഥിയാകും. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി , ഡോ. ബഹാഉദ്ദീന്‍ മുഹമ്മദ് നദ്‌വി, കെ.സി മുഹമ്മദ് ബാഖവി, പി. ഇസ്ഹാഖ് ബാഖവി, എം.കെ ജാബിറലി ഹുദവി, എ.പി മുസ്തഫ ഹുദവി അരൂര്‍, സി.എച്ച് ശരീഫ് ഹുദവി പങ്കെടുക്കും. കോണ്‍ഫറന്‍സ് ഞായറാഴ്ച സമാപിക്കും.