കാഞ്ഞങ്ങാട്: അസഹിഷ്ണുതക്കെതിരേ ചുവപ്പിന്റെ സാഗരം തീര്‍ത്തു യുവജനങ്ങളുടെ പ്രതിഷേധം. ചുവപ്പു മുണ്ടുടുത്തു തങ്ങളുടെ ഗ്രാമത്തില്‍ പ്രവേശിക്കാന്‍ പാടില്ലെന്ന ബി.ജെ.പി-ആര്‍.എസ്.എസ് നിലപാടില്‍ പ്രതിഷേധിച്ചു കാഞ്ഞങ്ങാട് നഗരത്തിലാണ് ഡി.വൈ.എഫ്. ഐ ജില്ലാകമ്മിറ്റിയുടെ നേതൃത്വത്തില്‍ പ്രതിരോധം തീര്‍ത്തത്. ചെഗുവേര ചിത്രങ്ങളും ഉയര്‍ത്തിപ്പിടിച്ചിരുന്നു. കഴിഞ്ഞ ദിവസം കാഞ്ഞങ്ങാടിനടുത്ത പറക്കളായില്‍ ചുവന്ന മുണ്ടണ്ടുടുത്തെത്തിയ സിനിമാ പ്രവര്‍ത്തകനെയും സുഹൃത്തുക്കളെയും അക്രമിച്ചതിലും കോട്ടപ്പാറയില്‍ ചെഗുവരെയുടെ ചിത്രംപതിച്ച ഹെല്‍മറ്റ് ധരിച്ചു ബൈക്കില്‍ യാത്രചെയ്തതിനു കണ്ണൂര്‍ മയ്യില്‍ സ്വദേശികളായ യുവാക്കളെ അക്രമിച്ചതിലും പ്രതിഷേധിച്ചു സംഘടിപ്പിച്ച സംഗമംമാന്തോപ്പ് മൈതാനിയില്‍ എം രാജഗോപാലന്‍ എം.എല്‍.എ ഉദ്ഘാടനം ചെയ്തു. ഡി.വൈ.എഫ.്‌ഐ ജില്ലാ പ്രസിഡന്റ് ശിവജി വെള്ളിക്കോത്ത് അധ്യക്ഷനായി. സി.ജെ സജിത്ത്, എം രാജീവന്‍, കെ.സബീഷ് , സി.എ സുബൈര്‍, പി.കെ നിഷാന്ത്,കെ.മണികണ്ഠന്‍ സംസാരിച്ചു.