കോഴിക്കോട്: ജില്ലയിലെ ആദ്യത്തെ സമ്പൂര്‍ണ വൈദ്യുതീകരണ മണ്ഡലമെന്ന ഖാദി ഇനി കോഴിക്കോട് നോര്‍ത്തിന് സ്വന്തം. സമ്പൂര്‍ണ വൈദ്യുതീകരണ പ്രഖ്യാപനം 17ന് വൈദ്യുതി വകുപ്പ് മന്ത്രി എം.എം മണി നിര്‍വഹിക്കും. ഗാന്ധി റോഡില്‍ നിര്‍മാണം പൂര്‍ത്തിയാക്കിയ സംസ്ഥാനത്തെ ആദ്യ 110 കെ.വി ജി.ഐ.എസ് സബ്‌സ്‌റ്റേഷന്‍ ഉദ്ഘാടനവും ചടങ്ങില്‍ നടക്കും. രാവിലെ 11ന് ഗാന്ധിറോഡ് സെന്റ് ജോസഫ്‌സ് പള്ളി ഓഡിറ്റോറിയത്തിലാണ് ചടങ്ങ്.
2017 മാര്‍ച്ചോടെ കേരളത്തെ ഇന്ത്യയിലെ ആദ്യത്തെ സമ്പൂര്‍ണ വൈദ്യുതികരണ സംസ്ഥാനമായി പ്രഖ്യാപിക്കുന്നതിന്റെ ആദ്യപടിയാണ് നോര്‍ത്ത് മണ്ഡലത്തിലെ സമ്പൂര്‍ണ വൈദ്യുതികരണം. നഗര പരിധിയില്‍പ്പെട്ട 29 വാര്‍ഡുകള്‍ ഉള്‍പ്പെട്ട നോര്‍ത്ത് നിയോജക മണ്ഡലത്തില്‍ നടക്കാവ്, വെസ്റ്റ്ഹില്‍, കാരപ്പറമ്പ്, വെള്ളിമാട്കുന്ന്, കോവൂര്‍, പൊറ്റമ്മല്‍ സെക്ഷന്‍ ഓഫിസുകളിലായി 150 ഗുണഭോക്താക്കളാണ് ഈ പദ്ധതിയില്‍ രജിസ്റ്റര്‍ ചെയ്തിരുന്നത്. കൂടാതെ വയറിങ് സ്വന്തമായി ചെയ്യാന്‍ സാമ്പത്തികശേഷി ഇല്ലാതിരുന്ന ആറ് കുടുംബങ്ങള്‍ക്ക് കെ.എസ്.ഇ.ബി ജീവനക്കാര്‍, സര്‍വിസ് സംഘടനകള്‍, കെ.എസ്.ഇ.ബി റിക്രിയേഷന്‍ ക്ലബ് തുടങ്ങിയവരുടെ സഹായത്തോടെ വയറിങ് പൂര്‍ത്തീകരിച്ചു നല്‍കുകയും ചെയ്തിരുന്നു. വെസ്റ്റ്ഹില്‍ 110 കെവി സബ് സ്‌റ്റേഷനില്‍ നിന്നും 7.03 കിലോമീറ്റര്‍ ദൂരത്തില്‍ സ്ഥാപിച്ചിട്ടുള്ള 110 കെ.വി ഭൂഗര്‍ഭ കേബിള്‍ വഴിയാണ് 110 കെ.വി ജി.ഐ.എസ് സബ് സ്‌റ്റേഷനിലേക്ക് വൈദ്യുതി എത്തിക്കുന്നത്.
ഇതോടെ നഗരത്തിലും തീരപ്രദേശങ്ങളിലും മികച്ച വോള്‍ട്ടേജില്‍ വൈദ്യുതി ലഭ്യമാക്കാന്‍ ഈ പദ്ധതി ഉപകരിക്കും. നടക്കാവ്, സെന്‍ട്രല്‍, ബീച്ച്, വെസ്റ്റ്ഹില്‍ എന്നി സെക്ഷന്‍ പരിധിയിലുള്ളവര്‍ക്ക് പദ്ധതിയുടെ പ്രയോജനം ലഭ്യമാകും. വാര്‍ത്താസമ്മേളനത്തില്‍ എ. പ്രദീപ് കുമാര്‍ എം.എല്‍.എ, എക്‌സിക്യൂട്ടിവ് എന്‍ജിനീയര്‍ വി.വി സാബു, അസി. എക്‌സിക്യൂട്ടിവ് എന്‍ജിനീയര്‍ ഷിബു അലക്‌സ് ജോര്‍ജ് സംബന്ധിച്ചു.