മനാമ: ഗള്‍ഫിലെങ്ങും കോട്ടുമല ബാപ്പുമുസ്‌ലിയാര്‍ക്ക് വേണ്ടി പ്രാര്‍ഥനാ സദസുകളും അനുസ്മരണ ചടങ്ങും നടന്നു. വാരാന്ത അവധിദിവസങ്ങളായ വ്യാഴാഴ്ചയും വെള്ളിയാഴ്ചയുമായിരുന്നു പരിപാടികള്‍. വിവിധ സംഘടനാ ആസ്ഥാനങ്ങളില്‍ മയ്യിത്ത് നിസ്‌കാരം, ഖത്തം ദുആ, ദിക്‌റ് ഹല്‍ഖ മജിലിസുകള്‍ നടന്നു.
മനാമ ഗോള്‍ഡ് സിറ്റിയിലെ സമസ്ത ബഹ്‌റൈന്‍ ആസ്ഥാനത്ത് നടന്ന ഖത്മുല്‍ ഖുര്‍ആന്‍ ദിക്‌റ്, ദുആ മജ്‌ലിസിനും മയ്യിത്ത് നിസ്‌കാരത്തിനും സമസ്ത ബഹ്‌റൈന്‍ പ്രസിഡന്റ് ഫഖ്‌റുദ്ദീന്‍ കോയ തങ്ങള്‍ നേതൃത്വം നല്‍കി.
വിവിധ പ്രവാസി സംഘടനാ പ്രതിനിധികളും പോഷക സംഘടനാ പ്രതിനിധികളും ചടങ്ങില്‍ സംബന്ധിച്ചു.  വിവിധ ഏരിയാ കമ്മിറ്റികള്‍, ബഹ്‌റൈന്‍ റെയ്ഞ്ച് ജംഇയ്യത്തുല്‍ മുഅല്ലിമീന്‍, എസ്.കെ.എസ്.എസ്.എഫ് ബഹ്‌റൈന്‍, സമസ്ത വിഷന്‍, സമസ്ത മദ്‌റസ പി.ടി.എ , റഹ് മാനീസ് അസോസിയേഷന്‍ ബഹ്‌റൈന്‍ ചാപ്റ്റര്‍, കെ.എം.സി.സി ബഹ്‌റൈന്‍, ഐ.സി.എഫ് (കാന്തപുരം വിഭാഗം) ബഹ്‌റൈന്‍, ഫ്രന്റ്‌സ് ബഹ്‌റൈന്‍, തളിര്‍ ബഹ്‌റൈന്‍ കമ്മിറ്റി തുടങ്ങിയ സംഘടനകളും അനുശോചനം അറിയിച്ചിരുന്നു.
 സഊദി അറേബ്യ, യു.എ.ഇ, ഖത്തര്‍, കുവൈത്ത്, ഒമാന്‍ എന്നിവിടങ്ങളിലെ വിവിധ കേന്ദ്രങ്ങളിലും സുന്നി സെന്റര്‍, ഇസ്‌ലാമിക് സെന്റര്‍ ആസ്ഥാനങ്ങളിലും ചില പള്ളികളിലും മയ്യിത്ത് നിസ്‌കാരവും  പ്രാര്‍ഥനാ സദസുകളും അനുശോചന യോഗങ്ങളും സംഘടിപ്പിച്ചിരുന്നു.
മസ്ജിദുല്‍ ഹറാമിന്റെ മത്വാഫില്‍ വെച്ചാണ് ജിദ്ദ ഇസ്‌ലാമിക് സെന്ററിന്റെ നേതൃത്വത്തില്‍ പ്രാര്‍ഥനാ ചടങ്ങ് നടന്നത്.