കൊടുങ്ങല്ലൂര്‍: ആഘോഷത്തിന്റെ വര്‍ണ്ണക്കുടക്ക് കീഴെ ഒന്നാം താലപ്പൊലിയാഘോഷം. ശ്രീകുരുംബ ഭഗവതി ക്ഷേത്രത്തിലെ ഒന്നാം താലപ്പൊലിനാള്‍ വര്‍ണ്ണവാദ്യ വിസ്മയങ്ങളുടെ സംഗമമായി മാറി.
 ഉച്ചക്ക് ഒരു മണിക്ക് തെക്കെ നടയിലെ കുരുംബയമ്മയുടെ സന്നിധിയില്‍ നിന്നും എഴുന്നള്ളിപ്പ് ആരംഭിച്ചു.
 ഒമ്പത് ഗജവീരന്‍മാര്‍ അണിനിരന്ന എഴുന്നള്ളിപ്പിന് ദേവിയുടെ കോലമേന്തി അന്നമനട ഉമാമഹേശ്വരന്‍ നായകത്വം വഹിച്ചു. എഴുന്നള്ളിപ്പിന്റെ തുടക്കത്തില്‍ കേളത്ത് കുട്ടപ്പ മാരാരുടെ നേതൃത്വത്തിലുള്ള പഞ്ചവാദ്യം അകമ്പടിയേകി. എഴുന്നള്ളിപ്പ് ക്ഷേത്രാങ്കണത്തിലെ വലിയ പന്തലിലെത്തിയതോടെ പഞ്ചവാദ്യം മേളത്തിന് വഴിമാറി. പത്മശ്രീ പെരുവനം കുട്ടന്‍മാരാരുടെമാന്ത്രിക വിരലുകളില്‍ മേളം പെയ്തിറങ്ങിയപ്പോള്‍ ജനസാഗരം അലയടിച്ചു.