തൃശൂര്‍: സമസ്തകേരള ജംഇയ്യത്തുല്‍ ഉലമയുടെ നേതാക്കളായിരുന്ന ശൈഖുന കണ്ണിയത്ത് ഉസ്താദിന്റെയും ശംസുല്‍ ഉലമയുടേയും ആണ്ട് നേര്‍ച്ച ഇന്ന് രാവിലെ 9 മുതല്‍ പുലിക്കണ്ണി ദാറുതഖ്‌വ കാംപസില്‍ നടക്കും.  സമസ്ത പ്രസിഡന്റ് ശൈഖുന കുമരംപുത്തൂര്‍ എ.പി മുഹമ്മദ് മുസ്‌ലിയാരെയും സമസ്ത സെക്രട്ടറി, വിദ്യാഭ്യാസ ബോര്‍ഡ് ജനറല്‍ സെക്രട്ടറി, കേരള സംസ്ഥാന ഹജ്ജ് കമ്മിറ്റിയുടേയും സുപ്രഭാതം ദിനപത്രത്തിന്റേയും ചെയര്‍മാനുമായിരുന്ന ശൈഖുന കോട്ടുമല ടി.എം ബാപ്പുമുസ്‌ലിയാരുടേയും അനുസ്മരണവും ആണ്ടുനേര്‍ച്ചയോടനുബന്ധിച്ച് നടക്കും. സമസ്ത കേന്ദ്ര മുശാവറ അംഗമായ ചെറുവാളൂര്‍ ഹൈദ്രോസ് മുസ്‌ലിയാരുടെ നേതൃത്വത്തില്‍ എസ്.കെ.എസ്.എസ്.എഫ് തൃശ്ശൂര്‍ ജില്ലാ കമ്മിറ്റിയാണ് ആണ്ടു നേര്‍ച്ചയും അനുസ്മരണവും സംഘടിപ്പിച്ചിരിക്കുന്നത്. ഇന്ന് രാവിലെ 9 ന് പതാക ഉയര്‍ത്തലോടുകൂടി ആണ്ട് നേര്‍ച്ചക്ക് തുടക്കം കുറിക്കും. തുടര്‍ന്ന് ഖത്തമുല്‍ ഖുര്‍ആന്‍, മൗലീദ് പാരായണം, അനുസ്മര പ്രഭാഷണം, ദിക്ര്‍ മജ്‌ലിസ്, പ്രമേയ അവതരണം, കൂട്ടപ്രാര്‍ഥന എന്നീ പരിപാടികള്‍ക്കുശേഷം അന്നദാനത്തോടുകൂടി ആണ്ട് നേര്‍ച്ച സമാപിക്കും.
    സമസ്ത കേരള ജംഇയ്യത്തുല്‍ ഉലമ ട്രഷറര്‍ സയ്യിദ് ജിഫ്രി മുത്തുകോയ തങ്ങള്‍ ആണ്ടുനേര്‍ച്ചയുടെ ഉദ്ഘാടനം നിര്‍വഹിക്കും. സമസ്ത കേന്ദ്ര മുശാവറ അംഗങ്ങളായ സമസ്ത ജില്ലാ പ്രസിഡന്റ് എസ്.എം.കെ തങ്ങള്‍, ജില്ലാ ജനറല്‍ സെക്രട്ടറി എം.എം മുഹിയദ്ദീന്‍ മൗലവി എന്നിവര്‍ അനുഗ്രഹപ്രഭാഷണം നടത്തും. എസ്.എം.എഫ് ജില്ലാപ്രസിഡന്റും സംഘാടകസമിതി ചെയര്‍മാനും കേന്ദ്രമുശാവറ അംഗവുമായ ശൈഖുന ചെറുവാളൂര്‍ ഹൈദ്രോസ് മുസ്‌ലിയാര്‍ കൂട്ട പ്രാര്‍ഥനക്ക് നേതൃത്വം നല്‍കും. ജലീല്‍ റഹ്മാനി വാണിയന്നൂര്‍, എസ്.കെ.എസ്.എസ്.എഫ് സംസ്ഥാന വൈസ് പ്രസിഡന്റ് ഓണമ്പിള്ളി മുഹമ്മദ് ഫൈസി, ട്രഷറര്‍ ബഷീര്‍ ഫൈസി ദേശമംഗലം, അന്‍വര്‍ മുഹയിദ്ദീന്‍ ഹുദവി എന്നിവര്‍ അനുസ്മരണപ്രഭാഷണം നടത്തും. സമസ്ത സംസ്ഥാന, ജില്ലാ നേതാക്കള്‍ പരിപാടിയില്‍  പങ്കെടുക്കുമെന്ന് ഇല്ല്യാസ് ഫൈസി, ഷറഫുദ്ദീന്‍  വെമ്പേനാട,് കരീം ഫൈസി, സിദ്ദീഖ് ബദരി, ഷെഹീര്‍ ദേശമംഗലം, അംജദ്ഖാന്‍ അറിയിച്ചു.