കോഴിക്കോട്: പ്രധാനമന്ത്രി നരേന്ദ്രമോദിക്കെതിരെ ആഞ്ഞടിച്ച് വീണ്ടും രാഹുല്‍ ഗാന്ധി. കേന്ദ്രത്തിനും പ്രധാനമന്ത്രി നരേന്ദ്രമോദിക്കുമെതിരെ രൂക്ഷ വിമര്‍ശനമാണ് അദ്ദേഹം കോഴിക്കോട് കൊടിയത്തൂരിലെ തെരഞ്ഞെടുപ്പ് റാലിയില്‍ തൊടുത്തു വിട്ടത്.  

 മോദിയുടെ ഇലക്ടറല്‍ ബോണ്ടിനെ 'കൊള്ളയടിക്കല്‍' എന്ന മലയാള പദം ഉപയോഗിച്ച് രാഹുല്‍ പരിഹസിച്ചു. 

ആര്‍.എസ്.എസും ബി.ജെ.പിയും ഇന്ത്യന്‍ ഭരണഘടനയെ നശിപ്പിക്കാനും മാറ്റം വരുത്താനുമാണ് ശ്രമിക്കുന്നത്. ഇന്ത്യന്‍ ഭരണഘടനയെ സംരക്ഷിക്കാനാണ് കോണ്‍ഗ്രസും ഇന്‍ഡ്യ സഖ്യവും ഈ തെരഞ്ഞെടുപ്പില്‍ പോരാടുന്നത്. രാജ്യത്തെ അഞ്ചോ ആറോ അതി സമ്പന്നരുടെ കയ്യിലെ വെറുമൊരു പാവ മാത്രമാണ് മോദി. രാജ്യത്തിലെ യഥാര്‍ഥ പ്രശ്‌നത്തില്‍ നിന്ന് ജനങ്ങളുടെ ശ്രദ്ധ തിരിക്കല്‍ മാത്രമാണ് അദ്ദേഹത്തിന്റെ ജോലി. അതുകൊണ്ടാണ് ചിലപ്പോള്‍ മോദിയെ കടലിനടിയില്‍ പൂജ ചെയ്യുന്നതായും മറ്റു ചിലപ്പോള്‍ ആകാശത്ത് പറക്കുന്നതായും നമ്മള്‍ കാണുന്നത്- അദ്ദേഹം പരിഹസിച്ചു. 

മോദി അഴിമതിയെ സംരക്ഷിക്കുന്നു. കൊള്ളയടിക്കലിനെ മോദി ഇലക്ടറല്‍ ബോണ്ട് എന്ന് പറയുന്നു. മാധ്യമങ്ങള്‍ ഇലക്ടറല്‍ ബോണ്ടിനെ കുറിച്ച് ഒന്നും മിണ്ടുന്നില്ല. ഇലക്ടറല്‍ ബോണ്ട് സംബന്ധിച്ച് ഒരു ലേഖനം എഴുതിയാല്‍ സി.ബി.ഐയും ഇ.ഡിയും മാധ്യമപ്രവര്‍ത്തകരുടെ വീട്ടിലെത്തും. ഇതാണ് രാജ്യത്തെ ഇന്നത്തെ സാഹചര്യമെന്നും രാഹുല്‍ വ്യക്തമാക്കി.