കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ ഹജ്ജ് അപേക്ഷ സ്വീകരണം ഇനി എട്ട് ദിവസം മാത്രം. കഴിഞ്ഞ രണ്ടു മുതല്‍ ആരംഭിച്ച അപേക്ഷ വിതരണവും സ്വീകരണവും 24ന് അവസാനിക്കും.
ദിനേന അപേക്ഷ നല്‍കാനെത്തുന്നവരുടെ തിരക്ക് വര്‍ധിക്കുകയാണ്. ഇന്നലെ വരെ ഒന്‍പതിനായിരം കവറുകളിലായി 24,000 പേര്‍ അപേക്ഷ സമര്‍പ്പിച്ചു. ഹജ്ജിന് അപേക്ഷ സമര്‍പ്പിക്കാനായി പ്രത്യേക സൗകര്യം ഒരുക്കിയിട്ടുണ്ട്. എഴുപത് വയസ്സുകാര്‍ക്കും,തുടര്‍ച്ചയായി അഞ്ചാം വര്‍ഷക്കാര്‍ക്കും മറ്റുളളവര്‍ക്കുമെല്ലാം പ്രത്യേക കൗണ്ടര്‍ തന്നെ ഒരുക്കിയിട്ടുണ്ട്. എഴുപത് വയസ്സിന് മുകളിലുളള 600 പേര്‍ ഇതിനകം അപേക്ഷകരായുണ്ട്. ഇവര്‍ക്കും അഞ്ചാം വര്‍ഷക്കാര്‍ക്കും നേരിട്ട് അവസരം ലഭിക്കും. ശേഷിക്കുന്നവരില്‍ നറുക്കെടുപ്പ് നടത്തി തീര്‍ഥാടകരെ കണ്ടെത്തും. നറുക്കെടുപ്പ് മാര്‍ച്ച് ആദ്യവാരത്തില്‍ നടത്തും.
മുന്‍ വര്‍ഷത്തെ അപേക്ഷിച്ച് ഇത്തവണ ഹജ്ജ് അപേക്ഷ നല്‍കാനുളള സമയം കുറവായത് തീര്‍ഥാടകര്‍ക്ക് പ്രശ്‌നങ്ങള്‍ സൃഷ്ടിക്കുന്നുണ്ട്. കഴിഞ്ഞ വര്‍ഷങ്ങളില്‍ ഒരുമാസത്തിലേറെ അപേക്ഷ സമര്‍പ്പിക്കാന്‍ സമയം കിട്ടിയിരുന്നു. നിലവില്‍ ഇനി എട്ട് ദിവസം മാത്രമാണ് ശേഷിക്കുന്നത്. അപേക്ഷ സമര്‍പ്പണ തിയതി നീട്ടണമെന്നാവശ്യവും ഉയര്‍ന്നിട്ടുണ്ട്.അപേക്ഷകര്‍ക്ക് ജനുവരി 31നകം കവര്‍ നമ്പര്‍ ലഭിച്ചിട്ടില്ലെങ്കില്‍ അപേക്ഷയുടെ ഫോട്ടോ കോപ്പി സഹിതം ഫെബ്രുവരി നാലിന് മുന്‍പായി ഹജ്ജ് കമ്മിറ്റി ഓഫിസുമായി ബന്ധപ്പെടണം.