ഗൂഡല്ലൂര്‍: ഇനി മൂന്നുനാള്‍ ഊട്ടിനഗരം ഉത്സവത്തിമിര്‍പ്പിലാകും. പ്രസിദ്ധമായ ഊട്ടി പുഷ്‌പോത്സവം ഇന്നാരംഭിക്കുകയാണ്. ഊട്ടി സസ്യോദ്യാനത്തില്‍ നടക്കുന്ന 120ാമത് ഊട്ടി പുഷ്പമഹോത്സവം ഇന്നു രാവിലെ തമിഴ്‌നാട് കൃഷിമന്ത്രി ദുരൈകണ്ണ് ഉദ്ഘാടനം ചെയ്യും.
പുഷ്പമേളയുടെ ഒരുക്കങ്ങള്‍ പൂര്‍ത്തിയായതായി അധികൃതര്‍ അറിയിച്ചു. കൃഷി, ടൂറിസം വകുപ്പ്, ജില്ലാഭരണകൂടം എന്നിവയുടെ സംയുക്താഭിമുഖ്യത്തിലാണ് പുഷ്പമേള സംഘടിപ്പിക്കുന്നത്. സഞ്ചാരികളെ വരവേല്‍ക്കാനുള്ള അവസാന മിനുക്കുപണിയിലാണു ബൊട്ടാണിക്കല്‍ ഗാര്‍ഡനിലെ ജീവനക്കാര്‍.
1.30 ലക്ഷം കാര്‍ണീഷ്യം ഉള്‍പ്പെടെയുള്ള വിവിധ വര്‍ണങ്ങളിലുള്ള പൂക്കള്‍കൊണ്ട് സൃഷ്ടിച്ച 68 അടി നീളവും 30 അടി ഉയരവും 10 അടി വീതിയുമുള്ള ചെന്നൈ സെന്‍ട്രല്‍ റെയില്‍വേ സ്റ്റേഷന്റെ മാതൃക മേളയില്‍ സഞ്ചാരികളുടെ മനംകവരും. കൂടാതെ 15,000 ചട്ടികളിലായി അലങ്കരിച്ച പൂക്കളുടെ ശേഖരവും ഒരുക്കിയിട്ടുണ്ട്. വിവിധ നിറത്തിലുള്ള 6000 പൂക്കളുടെ വിസ്മയക്കാഴ്ചകളുംവിദേശരാജ്യങ്ങളില്‍ നിന്നും വിവിധ സംസ്ഥാനങ്ങളില്‍ നിന്നുമുള്ള നാലുലക്ഷം പൂക്കളുടെ വന്‍ ശേഖരവും മാരിഗോള്‍ഡ്, ഫ്രഞ്ച് മാരിഗോള്‍ഡ്, ഡാലിയ, ഗട്ടോനിയ, സൂര്യകാന്തി തുടങ്ങിയ പൂക്കള്‍ കൊണ്ട് സൃഷ്ടിച്ച മറ്റു കലാരൂപങ്ങളും തമിഴ്‌നാട്ടിലെ വിവിധ ജില്ലകളില്‍ നിന്നുള്ള കൃഷിവകുപ്പിന്റെ സ്റ്റാളുകളും മേളയിലുണ്ടാകും.
ഞായറാഴ്ച മേള സമാപിക്കും. സമാപന പരിപാടിയില്‍ തമിഴ്‌നാട് ഗവര്‍ണര്‍ കെ റോസയ്യ പങ്കെടുക്കും.