മാഡ്രിഡ്: റയല്‍ സോസിഡാഡിന്റെ മണ്ണില്‍ കഴിഞ്ഞ പത്തു വര്‍ഷമായി വിജയിക്കാന്‍ സാധിക്കാത്തതിന്റെ നാണക്കേട് ഒടുവില്‍ ബാഴ്‌സലോണ മായ്ചു കളഞ്ഞു. സ്പാനിഷ് കിങ്‌സ് കപ്പ് ക്വാര്‍ട്ടര്‍ ഫൈനലിന്റെ ആദ്യ പാദ പോരാട്ടത്തിലാണ് എവേ മത്സരത്തിനിറങ്ങിയ ബാഴ്‌സലോണ വിജയം സ്വന്തമാക്കിയത്.  മറുപടിയില്ലാത്ത ഒറ്റ ഗോളിനാണ് ബാഴ്‌സലോണ വിജയം പിടിച്ചത്.  ബ്രസീല്‍ സൂപ്പര്‍ താരം നെയ്മര്‍ 24ാം മിനുട്ടില്‍ പെനാല്‍റ്റിയിലൂടെ നേടിയ ഗോളിലാണ് ബാഴ്‌സയുടെ വിജയം.
വിജയവും ഒപ്പം എവേ ഗോളിന്റെ ആനുകൂല്ല്യവുമായി കറ്റാലന്‍ പടയ്ക്ക് സ്വന്തം മണ്ണില്‍ രണ്ടാം പാദത്തില്‍ ആത്മവിശ്വാസത്തോടെ ഇറങ്ങാം.  പത്ത് വര്‍ഷമായി റയല്‍ സോസിഡാഡിന്റെ മൈതാനത്ത് ബാഴ്‌സയ്ക്ക് ജയിക്കാന്‍ സാധിച്ചില്ലെന്ന മാനക്കേടാണ് പെനാല്‍റ്റി ഗോളിലൂടെ നെയ്മര്‍ അവസാനിപ്പിച്ചത്.
മറ്റൊരു മത്സരത്തില്‍ അത്‌ലറ്റിക്കോ മാഡ്രിഡ് മറുപടിയില്ലാത്ത മൂന്നു ഗോളുകള്‍ക്ക് എയ്ബറിനെ തകര്‍ത്തു വിട്ടു. 28ാം മിനുട്ടില്‍ അന്റോയിന്‍ ഗ്രിസ്മന്‍  60ാം മിനുട്ടില്‍ എയ്ഞ്ചല്‍ കൊറേയ, 68ാം മിനുട്ടില്‍ കെവിന്‍ ഗമെയ്‌റോ എന്നിവരാണ് അത്‌ലറ്റിക്കോക്കായി വല ചലിപ്പിച്ചത്.