മൂവാറ്റുപുഴ: കോടികള്‍ വിലമതിക്കുന്ന സര്‍ക്കാര്‍ ഭൂമി കാടുകയറി നശിക്കുന്നു. നാട്ടുകാര്‍ കൈയേറിയതിനെത്തുടര്‍ന്നു ഭൂമിയുടെ അളവിലും കുറവുവന്നതായി സൂചനയുണ്ട്. പായിപ്ര നെല്ലിക്കുഴി റോഡില്‍ പായിപ്ര സ്‌കൂള്‍ ജങ്ഷനില്‍ ഒരേക്കറോളം വരുന്നതും കോടികള്‍ വിലമതിക്കുന്നതുമായ റോഡരുകിലെ ഭൂമിക്കാണു ദുര്‍ഗതി.
വിദ്യാഭ്യാസ വകുപ്പിന്റെ ഈ ഭൂമി പായിപ്ര ഗവണ്മന്റ് യു.പി സ്‌ക്കൂളിന്റെ കൈവശത്തിലാണ് . പായിപ്ര ഗ്രാമ പഞ്ചായത്ത് രണ്ടാം വാര്‍ഡിലുളള ഭൂമി 25 വര്‍ഷത്തോളമായി അനാഥമായി കിടക്കുകയാണ്. ഒരേക്കറിലധികം ഉണ്ടായിരുന്ന സ്ഥലം പലരും കൈയേറുകയും കൈവശപ്പെടുത്തുകയും ചെയ്തിട്ടും സ്‌കൂള്‍ അധികൃതരോ, സര്‍ക്കാരോ ഈ കാര്യങ്ങളില്‍ ശ്രദ്ധിക്കുകയോ, നടപടിയെടുക്കുകയോ ചെയ്തിട്ടില്ലെന്നും നാട്ടുകാര്‍ പറയുന്നു.
വിദ്യാഭ്യാസ വകുപ്പിന്റേയോ, പഞ്ചായത്ത് വകുപ്പിന്റേയോ കീഴിലുളള ഏതെങ്കിലും സ്ഥാപനങ്ങള്‍ പ്രവര്‍ത്തിക്കുന്നതിന് ആവശ്യമായ തീരുമാങ്ങളെടുത്തു സ്ഥലം സംരക്ഷിക്കേണ്ടതു സര്‍ക്കാരും പ്രാദേശിക ഭരണകൂടവുമാണ്. ഒരു മിനി സ്‌റ്റേഡിയം നിര്‍മിക്കുന്നതിനാവശ്യ മായ എല്ലാ സൗകര്യവുമിവിടെയുണ്ട്.
വസ്തുതകളെല്ലാം ചൂണ്ടികാട്ടി നിരവധി നിവേദനങ്ങള്‍ ഇതിനകം ബന്ധപ്പെട്ടവര്‍ക്ക് നല്‍കിയെങ്കിലും ഇതുവരെ നടപടിയുണ്ടായില്ലെന്നും നാട്ടുകാര്‍ പറഞ്ഞു.
കോടികള്‍ വിലവരുന്ന പായിപ്ര സ്‌ക്കൂള്‍ ജങ്ഷനു സമീപമുളള സര്‍ക്കാര്‍ ഭൂമി ഇനിയും മറ്റുളളവര്‍ക്ക് കൈയേറുന്നതിനും വേസ്റ്റ് നിക്ഷേപിക്കുന്നതിനും ഇടനല്‍കാതെ കായിക പ്രതിഭകള്‍ക്ക് പരിശീലനത്തിനുളള ഇടമായി സംരക്ഷിക്കണമെന്ന ആവശ്യം ശക്തമാണ്.