മണ്ണാര്‍ക്കാട്: സമസ്തകേരള ജംഇയ്യത്തുല്‍ മുദരിസ്സീന്‍ പാലക്കാട് ജില്ലാ കമ്മിറ്റി മണ്ണാര്‍ക്കാട് മണലടിയില്‍ നടത്തിയ ജില്ലാ ദര്‍സ് ഫെസ്റ്റില്‍ കുളപ്പറമ്പ് മദീനത്തുല്‍ ഉലൂം ജേതാക്കളായി.
ജില്ലയിലെ വിവിധ ദര്‍സുകളില്‍ നിന്നായി 500ലധികം വിദ്യാര്‍ഥികള്‍ 56 ഇനങ്ങളിലായി മത്സരിച്ചു. സീനിയര്‍ വിഭാഗത്തില്‍ 147 പോയന്റ് നേടി മദീനത്തുല്‍ ഉലൂം ദര്‍സും 98 പോയന്റ് നേടിയ മണലടി ദര്‍സും 54 പോയന്റോടെ നെല്ലായ ദര്‍സും ഒന്നും രണ്ടും മൂന്നും സ്ഥാനങ്ങള്‍ കരസ്ഥമാക്കി.
ജൂനിയര്‍ വിഭാഗത്തില്‍ 129 പോയന്റോടെ ഇര്‍ശാദുത്വലബ സലാമ മസ്ജിദ് ചെര്‍പ്പുളശ്ശേരി ഒന്നാം സ്ഥാനവും 121 പോയന്റ് നേടിയ മദീനത്തുല്‍ ഉലൂം കുളപ്പറമ്പ് രണ്ടാം സ്ഥാനവും നേടി. 74 പോയന്റ് നേടിയ റബ്ബാനിയ മണലടിയാണ് മൂന്നാം സ്ഥാനം നേടിയത്.
സീനിയര്‍ വിഭാഗത്തില്‍ കുളപ്പറമ്പ് ദര്‍സ് വിദ്യാര്‍ഥി ജഅ്ഫറും ജൂനിയര്‍ വിഭാഗത്തില്‍ ചെര്‍പ്പുളശ്ശേരി ദര്‍സ് വിദ്യാര്‍ഥി മുഹമ്മദ് ആസിഫും കലാപ്രതിഭകളായി. സമാപന സംഗമത്തില്‍ ജംഇയ്യത്തുല്‍ മുദരിസ്സീന്‍ ജില്ലാ സെക്രട്ടറി സി. മുഹമ്മദ്കുട്ടി ഫൈസി അലനല്ലൂര്‍ അധ്യക്ഷനായി. ഖാദര്‍ ഫൈസി കുന്നുംപുറം ട്രോഫികള്‍ വിതരണം ചെയ്തു. മൊയ്തീന്‍ ഫൈസി, മണലടി മുദരിസ് അലി ഫൈസി, സ്വാലിഹ് ഫൈസി കുളപ്പറമ്പ്, ശറഫുദ്ധീന്‍ അന്‍വരി തുപ്പനാട്, മഹല്ല് പ്രസിഡന്റ് വാപ്പുട്ടി ഹാജി, സെക്രട്ടറി സലാം മാസ്റ്റര്‍, ട്രഷറര്‍ പഴേരി ശരീഫ് ഹാജി സംബന്ധിച്ചു.