ദോഹ: വീടുകള്‍ക്ക് മുമ്പില്‍ നിര്‍ത്തിയിട്ട വാഹനങ്ങളില്‍ നിന്നും ടയറുകള്‍ മോഷ്ടിക്കുന്ന മൂന്നംഗ സംഘത്തെ പൊലിസ് അറസ്റ്റ് ചെയ്തു. കോടതിയില്‍ ഹാജരാക്കിയ സംഘത്തെ ഒരു വര്‍ഷത്തെ തടവിന് കോടതി ശിക്ഷിച്ചു. ശിക്ഷാ നടപടികള്‍ക്ക് ശേഷം പ്രതികളെ നാടുകടത്താനും കോടതി വിധിച്ചിട്ടുണ്ട്. വാഹന ഉടമകള്‍ തങ്ങളുടെ വീടിന് മുമ്പില്‍ നിര്‍ത്തിയിട്ടിരുന്ന കാറുകളില്‍ നിന്നാണ് സംഘം ടയറുകള്‍ മോഷ്ടിച്ചിരുന്നത്. വിരലടയാള വിദഗ്ധര്‍ക്ക് പ്രതികളില്‍ നിന്നുള്ള തെളിവുകള്‍ ലഭിച്ചിരുന്നില്ലെങ്കിലും ഒരേ രീതിയിലുള്ള ആറ് കേസുകള്‍ റിപ്പോര്‍ട്ട് ചെയ്യപ്പെട്ടതോടെ അന്വേഷണ സംഘം ശക്തമായ അന്വേഷണം നടത്തുകയായിരുന്നു.
വാഹനത്തില്‍ നിന്നും ടയറുകള്‍ അഴിച്ചെടുക്കുന്ന സംഘം പകരം മോശമായ ടയറുകള്‍ ഘടിപ്പിക്കുകയും നല്ല ടയറുകള്‍ വില്‍പ്പന നടത്തുകയുമാണ് പതിവെന്ന് അന്വേഷണ സംഘം കണ്ടെത്തുകയായിരുന്നു. രേഖകള്‍ പ്രകാരം പ്രതികളിലൊരാള്‍ തെരുവില്‍ നിരീക്ഷണം നടത്തുകയും മറ്റു രണ്ടുപേര്‍ മോഷണം നടത്തുകയുമാണ് പതിവ്.