കോട്ടയം : വില്‍പനക്കായെത്തിച്ച 14 ലക്ഷം രൂപ വിലവരുന്ന മുപ്പതിനായിരം പായ്ക്കറ്റ് നിരോധിത പുകയില ഉല്‍പന്നമായ ഹാന്‍സ് ചങ്ങനാശ്ശേരിയില്‍ നിന്ന് പിടികൂടി.
ഹാന്‍സ് സൂക്ഷിച്ചതിന് ഈരാറ്റുപേട്ട കടുവാമുഴി പണ്ടാരപ്പറമ്പില്‍ ഈസാ(40),ഈരാറ്റുപേട്ട നടക്കല്‍ വേലിയില്‍ ഷിയാസ്(31) എന്നിവരാണ് അറസ്റ്റിലായത്.
ഇന്നലെ പുലര്‍ച്ചെ മാര്‍ക്കറ്റിനു സമീപമുള്ള പൊളിയാറായ പഴയവീട്ടില്‍ കാറില്‍ കൊണ്ടുവന്നു ഇറക്കാന്‍ ശ്രമിക്കുന്നതിനിടെയാണ് പിടിയിലാകുന്നത്.
നിരോധിത ഉല്‍പന്നം വിറ്റഴിക്കുന്നതായി ജില്ലാ പൊലിസ്‌മേധാവി എന്‍ രാമചന്ദ്രനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ഇവരുടെ ഫോണ്‍ നമ്പരുകള്‍ നിരീക്ഷിച്ചിരുന്നു. രണ്ടാഴ്ചക്കുള്ളില്‍ ആറുതവണയെങ്കിലും ഇവര്‍ ബാംഗ്ലൂരില്‍ പോകുന്നതായും കണ്ടെത്തി.
തുടര്‍ന്നാണ് ചങ്ങനാശ്ശേരിയില്‍ ഹാന്‍സുമായി എത്തുന്നുണ്ടെന്നു മനസിലാക്കിയ പൊലീസ് ഇന്നലെ പുലര്‍ച്ചെ അറസ്റ്റു ചെയ്യുന്നത്.