ദോഹ: വാഹനങ്ങള്‍ ഉപയോഗിച്ച് നിരത്തുകളിലും മറ്റും വ്യാപാരം നടത്തുന്നവര്‍ക്ക് സാമ്പത്തിക വാണിജ്യമന്ത്രാലയം മാര്‍ഗനിര്‍ദേശങ്ങള്‍ നല്‍കി. ആരംഭിക്കാന്‍ ലക്ഷ്യമിടുന്ന തൊഴിലിനെക്കുറിച്ച് വ്യക്തവും കൃത്യവുമായ പദ്ധതി തയാറാക്കണമെന്നാണ് നിര്‍ദേശം. പ്രതീക്ഷിക്കുന്ന ലാഭം, സാധ്യതയുള്ള ഉപഭോക്താക്കള്‍, ബജറ്റ്, പ്രതീക്ഷിക്കുന്ന വരുമാനം എന്നിവയെല്ലാം ഇതിലുള്‍പ്പെടുത്തണം.

തൊഴിലിന്റെ വ്യാപ്തി, ലക്ഷ്യമിടുന്ന ഉപഭോക്താക്കള്‍ എന്നിവ കണക്കിലെടുത്തായിരിക്കണം കൃത്യമായ ആസൂത്രണം തയാറാക്കേണ്ടത്. വ്യാപാരം തുടങ്ങുന്നതിനായി ജനസാന്ദ്രതയേറിയതും പൊതുജനങ്ങളുടെ സാന്നിധ്യം കൂടുതലായി അനുഭവപ്പെടാനിടയുള്ളതുമായ സ്ഥലങ്ങള്‍ തെരഞ്ഞെടുക്കാന്‍ ശ്രദ്ധിക്കണം. അതേസമയം സ്ഥലം തിരഞ്ഞെടുക്കുമ്പോള്‍ ഇതേ വ്യാപാരത്തിലേര്‍പ്പെട്ടിരിക്കുന്ന സ്ഥാപനങ്ങളുടെ എന്‍ട്രി, എക്‌സിറ്റ് മേഖലകളില്‍ നിന്ന് നിശ്ചിത അകലം പാലിക്കണം.

സിവില്‍ ഡിഫന്‍സ്, ഗതാഗത വകുപ്പ്, മുനിസിപ്പാലിറ്റി, പരിസ്ഥിതി ആരോഗ്യ കാര്യ വകുപ്പ് തുടങ്ങി ബന്ധപ്പെട്ട എല്ലാ വകുപ്പുകളില്‍ നിന്നുള്ള ലൈസന്‍സുകളും അനുമതിയും സ്വന്തമാക്കിയിരിക്കണം. വ്യാപാരത്തിനാവശ്യമായ എല്ലാ സര്‍ട്ടിഫിക്കറ്റുകളും രേഖകളും സമര്‍പ്പിക്കണം. സേവനത്തിന്റെയും ഉത്പന്നത്തിന്റെയും തെരഞ്ഞെടുപ്പ്, വ്യാപാരത്തിന് അനുയോജ്യമായ സ്ഥലം, ഉത്പന്നം പ്രദര്‍ശിപ്പിക്കുന്ന രീതി തുടങ്ങിയ കാര്യങ്ങളില്‍ നവീനമായ സമീപനവും ആശയങ്ങളുമായിരിക്കണം സ്വീകരിക്കേണ്ടത്.

വാണിജ്യമുദ്ര തെരഞ്ഞെടുക്കുന്നതില്‍ പ്രത്യേക ശ്രദ്ധ കേന്ദ്രീകരിക്കണം. നവീനവും ഉപഭോക്താക്കളെ ആകര്‍ഷിക്കുന്നതുമായ ഡിസൈന്‍ ഉപയോഗിക്കണം. സാമൂഹിക മാധ്യമങ്ങളിലൂടെ വ്യാപാരസംരംഭങ്ങള്‍ക്ക് വിപണി ഉറപ്പാക്കണം. സ്വകാര്യ മേഖലയുടെ തൊഴില്‍ അന്തരീക്ഷം മെച്ചപ്പെടുത്തുന്നതിന്റെ ഭാഗമായി വാഹനങ്ങള്‍ ഉപയോഗിച്ച് വ്യാപാരം നടത്തുന്നവര്‍ക്ക് പന്ത്രണ്ട് പുതിയ സംരംഭങ്ങള്‍ക്ക് അനുമതി നല്‍കിയത്. ഭക്ഷണം പാനീയങ്ങളുടെ വില്‍പ്പന, ടയര്‍ നന്നാക്കല്‍, അറ്റകുറ്റപ്പണി, ഇലക്ട്രീഷ്യന്‍, കാര്‍പെന്റര്‍, സലൂണ്‍, തയ്യല്‍ക്കട തുടങ്ങിയവയ്ക്കാണ് അനുമതി.