ഷിംല: കേന്ദ്ര സര്‍വീസില്‍ സംവരണം ആവശ്യപ്പെട്ട് ഹരിയാനയില്‍ ജാട്ട് സമുദായക്കാരുടെ പ്രതിഷേധം വീണ്ടും. കഴിഞ്ഞ വര്‍ഷം ഫെബ്രുവരിയില്‍ സംവരണം ആവശ്യപ്പെട്ട് നടത്തിയ ശക്തമായ പ്രക്ഷോഭത്തിനു ശേഷം ഇന്നലെ വീണ്ടും ഇവര്‍ പ്രതിഷേധവുമായി എത്തുകയായിരുന്നു. കഴിഞ്ഞ പ്രക്ഷോഭത്തില്‍ വന്‍ നാശനഷ്ടങ്ങളാണ് ഉണ്ടായിരുന്നത്. ആയിരക്കണക്കിന് ആളുകള്‍ക്ക് പരുക്കേല്‍ക്കുകയും ലക്ഷക്കണക്കിന് സ്വത്തുവകകള്‍ക്ക് കേടുപാടുകള്‍ പറ്റുകയും ചെയ്തിരുന്നു.
എന്നാല്‍ ഇന്നലെ നടന്ന സമരം സമാധാനപരമായിരുന്നു. ജസിയ ഗ്രാമത്തിനു പുറമെ സോനാപേട്ട്, ഝാജര്‍, ജിന്ദ്, ഭിവാനി അടക്കമുള്ള ജില്ലാ ആസ്ഥാനങ്ങളിലും പ്രതിഷേധ ധര്‍ണ നടന്നു. അടുത്ത ദിവസങ്ങളിലായി പ്രക്ഷോഭം ശക്തിപ്പെടുത്തുമെന്ന് ജാട്ട് നേതാക്കള്‍ മുന്നറിയിപ്പ് നല്‍കി. തങ്ങളുടെ ആവശ്യങ്ങള്‍ പൂര്‍ണമായി അംഗീകരിക്കുന്നതുവരെ പ്രതിഷേധത്തില്‍ നിന്നും പിന്മാറില്ലെന്ന് ജാട്ട് നേതാവ് യശ്പാല്‍ മാലിക് അറിയിക്കുകയും ചെയ്തിട്ടുണ്ട്.
അതേസമയം ഏതെങ്കിലും തരത്തിലുള്ള അനിഷ്ട സംഭവങ്ങളുണ്ടാവുകയാണെങ്കില്‍ അത് നേരിടുന്നതിനായി ശക്തമായ സുരക്ഷയാണ് സംസ്ഥാനത്തിന്റെ വിവിധ ഭാഗങ്ങളില്‍ ഏര്‍പ്പെടുത്തിയിട്ടുള്ളത്. സംസ്ഥാനത്തെ 12 ജില്ലകളില്‍ ഇതിനകം നിരോധനാജ്ഞ പ്രഖ്യാപിച്ചിട്ടുണ്ട്.
മുന്‍സമരം ശക്തമാകുകയും സംസ്ഥാനത്തിന് വലിയ നാശനഷ്ടങ്ങള്‍ ഉണ്ടാവുകയും ചെയ്ത പശ്ചാത്തലത്തില്‍ സര്‍ക്കാറിന്റെ ആവശ്യപ്രകാരം കേന്ദ്ര സര്‍ക്കാര്‍ 55 കമ്പനി അര്‍ധ സൈനിക വിഭാഗത്തെ അയച്ചിട്ടുണ്ട്. ഇതില്‍  37 കമ്പനി സൈന്യത്തെ സംസ്ഥാനത്തിന്റെ വിവിധ ഭാഗങ്ങളിലായി വിന്യസിച്ചിട്ടുണ്ട്. ഇതിനിടയില്‍ ദ്രുത കര്‍മ സേനയും സംസ്ഥാനത്തിന്റെ സുരക്ഷക്കായി എത്തിയിട്ടുണ്ട്. നൂറുകണക്കിന് ഹോം ഗാര്‍ഡുകളും സുരക്ഷാ ജോലിക്കായി നിയോഗിക്കപ്പെട്ടിട്ടുണ്ട്.