HOME
DETAILS

പ്രധാനമന്ത്രിയുടെ സിംജാന്‍ യോജന പദ്ധതി: ജില്ലക്ക് 250 കോടി രൂപ അനുവദിച്ചു

  
backup
May 27 2016 | 23:05 PM

%e0%b4%aa%e0%b5%8d%e0%b4%b0%e0%b4%a7%e0%b4%be%e0%b4%a8%e0%b4%ae%e0%b4%a8%e0%b5%8d%e0%b4%a4%e0%b5%8d%e0%b4%b0%e0%b4%bf%e0%b4%af%e0%b5%81%e0%b4%9f%e0%b5%86-%e0%b4%b8%e0%b4%bf%e0%b4%82%e0%b4%9c%e0%b4%be

കാളികാവ്: നീര്‍ത്തട സംരക്ഷണത്തിനായുള്ള കേന്ദ്രാവിഷ്‌കൃത പദ്ധതിക്കു ഫണ്ട് അനുവദിച്ചു. നീര്‍ത്തട സംരക്ഷണത്തിനു ദേശീയ ഗ്രാമീണ തൊഴിലുറപ്പു പദ്ധതിയുമായി ഏകോപിപ്പിച്ചാണു പുതിയ പദ്ധതിക്കു രൂപം നല്‍കിയിട്ടുള്ളത്. പ്രധാമന്ത്രി സിംജാന്‍ യോജന എന്ന പദ്ധതിക്കു രാജ്യത്ത്  അരലക്ഷം കോടി രൂപയാണു നീക്കിവച്ചിട്ടുള്ളത്. അഞ്ചു വര്‍ഷമാണു പദ്ധതിയുടെ കാലാവധി.
ബ്ലോക്ക് തലത്തിലാണു പദ്ധതി നടപ്പിലാക്കുന്നത്. മഴവെള്ളം ഭൂമിയിലേക്ക് താഴ്ത്തി കാര്‍ഷിക വിളകളുടെ  ഉല്പാദനം വര്‍ധിപ്പിക്കുക എന്നതാണു പദ്ധതിയുടെ പ്രധാന ലക്ഷ്യം. ജല ദൗര്‍ലഭ്യത്തിനു പരിഹാരം  കാണാനും ഇതിലൂടെ കഴിയും. നിലവിലുള്ള നീര്‍ത്തട സംരക്ഷണ പദ്ധതിയുടെ പോരായ്മകള്‍  പരിഹരിച്ചാണ് പ്രധാനമന്ത്രി സിംജാന്‍ യോജനക്ക് രൂപം നല്‍കിയിട്ടുള്ളത്.
പദ്ധതിയിലൂടെ ദേശീയ ഗ്രാമീണ തൊഴിലുറപ്പു തൊഴിലാളികള്‍ക്ക് പുതിയ തൊഴിലവസരങ്ങളും സൃഷ്ടിക്കപ്പെടും.  മഴവെള്ളം കുത്തിയൊലിച്ചു പോകുന്നതിലൂടെ ഭൂഗര്‍ഭ ജലത്തിന്റെ അളവില്‍ കുറവു സംഭവിക്കുന്നുണ്ട്. മഴവെള്ളം ഭൂമിയിലേക്കാഴ്ത്തുന്നതിലൂടെ ഇതിനു പരിഹാരം കാണാമെന്നതിനു പുറമെ കാര്‍ഷിക ഉല്പാദനം വര്‍ധിപ്പിക്കാനും കഴിയുമെന്നാണു പദ്ധതി ലക്ഷ്യമിടുന്നത്.
കുളങ്ങള്‍  കുഴിക്കുക, ചെറു അണക്കെട്ടുകള്‍ നിര്‍മാണം, ചരിഞ്ഞ പ്രദേശത്തു തടയണ നിര്‍മ്മിച്ചു വെള്ളം തടഞ്ഞു നിര്‍ത്തി ഭൂഗര്‍ഭ ജലസംരക്ഷണം, കുളങ്ങളുടെ നവീകരണം, മഴക്കുഴി, മീന്‍ വളത്തല്‍ തുടങ്ങിയ  പ്രവൃത്തികളാണു മഴവെള്ള സംരക്ഷണത്തിനായി ആവിഷ്‌കരിച്ചിട്ടുള്ളത്. മഴവെള്ള  സംരക്ഷണത്തിലൂടെ കാര്‍ഷിക വിളകളുടെ ഉല്പാദനക്ഷമത വര്‍ധിപ്പിക്കാനാവും. കൃഷിയില്‍നിന്നുള്ള  വരുമാന വര്‍ധനവു സാധരണക്കാരുടെ ഉപഭോഗ ശേഷി വര്‍ധിപ്പിക്കാനും പ്രധാനമന്ത്രി സിംജാന്‍  യോജനയിലൂടെ കഴിയുമെന്നാണ് ചൂണ്ടിക്കാണിക്കുന്നത്. പദ്ധതിയുടെ നടത്തിപ്പിനു സംസ്ഥാനങ്ങള്‍ക്കു ഫണ്ട്  അനുവദിച്ച് തുടങ്ങി. മലപ്പുറം ജില്ലക്ക് 250 കോടി രൂപയാണു പദ്ധതി പ്രകാരം  അനുവദിച്ചിട്ടുള്ളത്. പരിസ്ഥിതി ദിനമായ ജൂണ്‍ അഞ്ചിനു രൂപരേഖ തയ്യാറാക്കി സമര്‍പ്പിക്കാന്‍  ബ്ലോക്കുകള്‍ക്ക് നിര്‍ദേശം നല്‍കിയിട്ടുണ്ട്. നിയസഭാ തിരഞ്ഞെടുപ്പ് വന്നതിനാല്‍ സംസ്ഥാനത്ത് പദ്ധതിയുടെ  നടത്തിപ്പ് വൈകിപ്പിക്കുകയായിരുന്നു.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."