കോഴിക്കോട്: ദക്ഷിണേന്ത്യയിലെ ഏറ്റവും പഴക്കമേറിയ സ്‌കൂളുകളിലൊന്നായ കോഴിക്കോട് സെന്റ് ജോസഫ്‌സ് ബോയ്‌സ് ഹയര്‍ സെക്കന്‍ഡറി സ്‌കൂള്‍ 225-ാം വര്‍ഷത്തിലേക്ക്.
സ്‌കൂളിന്റെ ദ്വിശതോത്തര രജത ജുബിലി ആഘോഷങ്ങള്‍ക്ക് നാളെ തുടക്കമാകും. ഒരുവര്‍ഷം നീണ്ടുനില്‍ക്കുന്ന ആഘോഷ പരിപാടികള്‍ക്കാണ് രൂപം നല്‍കിയിരിക്കുന്നത്. 224-ാം വാര്‍ഷികാഘോഷങ്ങളുടെ ഉദ്ഘാടനവും വിരമിക്കുന്ന ജീവനക്കാരെ ആദരിക്കലും നാളെ വൈകിട്ട് 5.30ന് നടക്കും. മന്ത്രി സി. രവീന്ദ്രനാഥ് ചടങ്ങുകള്‍ ഉദ്ഘാടനം ചെയ്യുമെന്ന് സ്‌കൂള്‍ പ്രിന്‍സിപ്പല്‍ ഫാ. കെ.ടി ദേവസ്യ എസ്.ജെ വാര്‍ത്താസമ്മേളനത്തില്‍ അറിയിച്ചു.
മലയാളം സര്‍വകലാശാല വൈസ് ചാന്‍സിലര്‍ കെ. ജയകുമാര്‍ ലോഗോ പ്രകാശനവും മുഖ്യപ്രഭാഷണവും നടത്തും.  ആഘോഷങ്ങളുടെ ഭാഗമായി പൂര്‍വവിദ്യാര്‍ഥി സംഗമം, സാഹിത്യസദസ്, മാതാപിതാക്കള്‍ക്കായി ക്ലാസുകള്‍ എന്നിവ സംഘടിപ്പിക്കും. മാസംതോറും ഒരു പരിപാടി എന്നരീതിയിലാണ് ആഘോഷങ്ങള്‍ സംഘടിപ്പിക്കുക. വിദ്യാര്‍ഥികള്‍ അവതരിപ്പിക്കുന്ന 'ജയ്ഹിന്ദ് ' സംഗീത ശില്‍പവും അരങ്ങേറും. പൊതുജനങ്ങളെക്കൂടി ഉള്‍ക്കൊള്ളിച്ചു കൊണ്ടായിരിക്കും ആഘോഷ പരിപാടികള്‍ നടക്കുക.
1793ല്‍  പോര്‍ച്ചുഗീസുകാര്‍ക്കുവേണ്ടി സ്ഥാപിച്ച യൂറോപ്യന്‍ ഹൈസ്‌കൂളാണിത്. പുതിയ ഹയര്‍ സെക്കന്‍ഡറി കെട്ടിടത്തിന്റെ പ്രവൃത്തികള്‍ ഇവിടെ പുരോഗിച്ചുകൊണ്ടിരിക്കുകയാണെന്നും അദ്ദേഹം അറിയിച്ചു.
സ്വാഗതസംഘം ചെയര്‍മാന്‍ എം. രാജന്‍, പ്രധാനാധ്യാപകന്‍ എം.വി ജോര്‍ജ്, സ്റ്റാഫ് സെക്രട്ടറി ഷാജി ആന്റണി, സ്‌കൂള്‍ മാനേജര്‍ ഫാ. വര്‍ഗീസ് ആന്റണി എസ്.ജെ, പി.ടി.എ പ്രസിഡന്റ സാബു ആന്‍. ജോസഫ്, പൂര്‍വ വിദ്യാര്‍ഥി സംഘടനാ പ്രസിഡന്റ എം. ജയരാജ്, സ്‌കൂള്‍ ഡയറക്ടര്‍ ഫാ. തദേവൂസ് എസ്. ജെ, ഫാ. എം.എഫ് ആന്റോ എസ്.ജെ എന്നിവരും വാര്‍ത്താസമ്മേളനത്തില്‍ പങ്കെടുത്തു.