തൃക്കരിപ്പൂര്‍: ലോക തണ്ണീര്‍ത്തട ദിനാചരണത്തിന്റെ ഭാഗമായി ജലവിഭവ വികസന പരിപാലനകേന്ദ്രം കോഴിക്കോടിന്റെ ആഭിമുഖ്യത്തില്‍ കവ്വായിക്കായലില്‍ 5000 കണ്ടല്‍ച്ചെടികള്‍ വച്ചുപിടിപ്പിക്കും. കവ്വായിക്കായല്‍ സംരക്ഷണ പ്രവര്‍ത്തനങ്ങളുടെ ഭാഗമായി സംഘടിപ്പിക്കുന്ന പരിപാടി ഫെബ്രുവരി നാലിനു ഉച്ചക്ക് 2.30ന് ഇടയിലെക്കാട് ബണ്ട് പരിസരത്ത് എം രാജഗോപാലന്‍ എം.എല്‍.എ ഉദ്ഘാടനം ചെയ്യും. വലിയപറമ്പ് ഗ്രാമപഞ്ചായത്ത് പ്രസിഡന്റ് എം.ടി അബ്ദുള്‍ ജബ്ബാര്‍ അധ്യക്ഷനായിരിക്കും.സി ഡബ്ല്യു ആര്‍.ഡി.എം ടെക്‌നിക്കല്‍ ഓഫിസര്‍ ശശിധരന്‍ പള്ളിക്കുടിയന്‍ പദ്ധതി രേഖ അവതരിപ്പിക്കും. ഗ്രാമ പഞ്ചായത്ത് മെമ്പര്‍ വി.കെ കരുണാകരന്‍, പി വേണുഗോപാലന്‍ എന്നിവര്‍ സംസാരിക്കും. ഇടയിലെക്കാട് നവോദയ വായനശാല ആന്‍ഡ് ഗ്രന്ഥാലയത്തിന്റെ സഹകരണത്തോടെയാണു പദ്ധതി നടപ്പാക്കുന്നത്.