വാഷിങ്ടണ്‍: ഹോളിവുഡിനെ പിടിച്ചുലച്ച ലൈംഗിക വിവാദങ്ങള്‍ ഗോള്‍ഡന്‍ ഗ്ലോബ് പുരസ്‌കാര വിതരണ ചടങ്ങിനെയും കീഴടക്കി.
ഗോള്‍ഡന്‍ ഗ്ലോബ് അവാര്‍ഡിന്റെ 75-ാമത് പതിപ്പാണ് കഴിഞ്ഞ ദിവസം നടന്നത്. ചടങ്ങില്‍ പുരസ്‌കാരം സ്വന്തമാക്കിയ മിക്കയാളുകളും സിനിമാരംഗത്തെ ലൈംഗിക ചൂഷണത്തിനെതിരേ പ്രസംഗങ്ങളില്‍ ആഞ്ഞടിച്ചു.
പ്രമുഖ ഹോളിവുഡ് നിര്‍മാതാവ് ഹാര്‍വി വെയ്ന്‍സ്റ്റൈനെതിരേയുള്ള നടിമാരുടെ ലൈംഗിക ആരോപണങ്ങളും തുടര്‍ന്നുള്ള വിവാദങ്ങളും പുറത്തുവന്ന ശേഷം നടക്കുന്ന ആദ്യത്തെ ഹോളിവുഡ് പുരസ്‌കാര ചടങ്ങായിരുന്നു ഇന്നലത്തേത്.
ബ്ലാക്ക് കോമഡി ക്രൈം ചിത്രമായ 'ത്രീ ബില്‍ബോര്‍ഡ് ഔട്ട്‌സൈഡ് എബ്ബിങ്, മിസോറി'യാണ് അവാര്‍ഡ് നിശയില്‍ കൂടുതല്‍ പുരസ്‌കാരങ്ങള്‍ വാരിക്കൂട്ടിയത്. മികച്ച ചലച്ചിത്രം, മികച്ച തിരക്കഥ, മികച്ച സഹനടന്‍, മികച്ച നടി എന്നിങ്ങനെ നാല് പുരസ്‌കാരങ്ങളാണ് ചിത്രം സ്വന്തമാക്കിയത്. നെറ്റ്ഫ്‌ളിക്‌സ് കോമഡി പരമ്പരയിലെ താരമായ അസീസ് അന്‍സാരി ഗോള്‍ഡന്‍ ഗ്ലോബ് പുരസ്‌കാരം സ്വന്തമാക്കുന്ന ആദ്യ ഏഷ്യക്കാരനുമായി.