ലഖ്‌നൗ: ഉത്തര്‍പ്രദേശില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുമായുള്ള ബന്ധം അവസാനിപ്പിക്കാന്‍ സമാജ് വാദി പാര്‍ട്ടി അധ്യക്ഷന്‍ അഖിലേഷിന്റെ തീരുമാനം. ഉത്തര്‍പ്രദേശ് നിയമസഭാ തെരഞ്ഞെടുപ്പിന് മുന്‍പായി ഇരുനേതാക്കളും സഖ്യം പ്രഖ്യാപിക്കുകയും എസ്.പിയുടെ തെരഞ്ഞെടുപ്പ് ചിഹ്നമായ സൈക്കിളിന്റെ രണ്ടു ചക്രങ്ങളാണെന്നും അതിനപ്പുറം ഗംഗ-യമുന നദികളുടെ സംഗമങ്ങളാണെന്നുമെല്ലാം പറഞ്ഞ് ബന്ധം സ്ഥാപിച്ചതിന് അല്‍പായുസ് മാത്രമേയുള്ളൂ എന്നാണ് ഇപ്പോള്‍ വ്യക്തമായത്. 2019ലെ ലോക്‌സഭാ തെരഞ്ഞെടുപ്പിന് മുന്‍പുതന്നെ ബന്ധം ഉപേക്ഷിക്കുമെന്നും കോണ്‍ഗ്രസിന് അവരുടെ വഴി നോക്കാമെന്നുമാണ് ഇന്നലെ അഖിലേഷ് യാദവ് പറഞ്ഞത്.
കോണ്‍ഗ്രസുമായി സഖ്യം ചേര്‍ന്നത് പാര്‍ട്ടിക്ക് ഒരുതരത്തിലും ഗുണം ചെയ്തില്ലെന്ന് അഖിലേഷ് പറഞ്ഞു. 2017ലെ നിയമസഭാ തെരഞ്ഞെടുപ്പില്‍ 403 അംഗ നിയമസഭയില്‍ 325 സീറ്റുകള്‍ നേടി ബി.ജെ.പി വിജയിച്ചപ്പോള്‍ എസ്.പിക്ക് 47 സീറ്റുകളും കോണ്‍ഗ്രസിന് ഏഴുസീറ്റുകളുമാണ് ലഭിച്ചത്. അടുത്ത പൊതു തെരഞ്ഞെടുപ്പിന് മുന്‍പായി പാര്‍ട്ടിയെ ശക്തിപ്പെടുത്താനാണ് ലക്ഷ്യം.