കൊണ്ടോട്ടി: ഭക്തിസാന്ദ്രമായ അന്തരീക്ഷത്തില്‍ കൊണ്ടോട്ടി ഖാസിയാരകം മഹല്ല് ഖാസിയായി പാണക്കാട് സയ്യിദ് ഹൈദരലി ശിഹാബ് തങ്ങളുടെ സ്ഥാനാരോഹണം നടത്തി. തുറക്കല്‍, മുണ്ടപ്പലം, വട്ടപ്പറമ്പ് മഹല്ല് മേല്‍ഖാസിയായും തങ്ങള്‍ ചുമതലയേറ്റു. ചെറുശ്ശേരി സൈനുദ്ദീന്‍ മുസ്‌ലിയാരുടെ ഒന്നാം ഉറൂസിനോടനുബന്ധിച്ചാണ് മഹല്ല് ഖാസി സ്ഥാനാരോഹണവും നടന്നത്.
1968 മുതല്‍ 2016 മരണംവരെ ഖാസിയാരകം ജുമുഅത്ത് പള്ളിയുടെ മഹല്ല് ഖാസി ചെറുശ്ശേരി സൈനുദ്ദീന്‍ മുസ്‌ലിയാരായിരുന്നു. അദ്ദേഹത്തിന്റെ മഖാം സിയാറത്തോടെയാണ് പരിപാടികള്‍ക്കു തുടക്കമായത്. കോഴിക്കോട് ഖാസി നാസര്‍ ഹയ്യ് ശിഹാബ് തങ്ങള്‍ ഖത്മുല്‍ ഖുര്‍ആന് നേതൃത്വം നല്‍കി.
പൊതുസമ്മേളനം സമസ്ത പ്രസിഡന്റ് സയ്യിദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്തു. മഹല്ല് പ്രസിഡന്റ് സി.പി കുഞ്ഞാന്‍ അധ്യക്ഷനായി. പാണക്കാട് ഹൈദരലി ശിഹാബ് തങ്ങള്‍ അനുഗ്രഹ പ്രഭാഷണം നടത്തി. എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂര്‍ മുഖ്യപ്രഭാഷണം നടത്തി. വാവാട് കുഞ്ഞിക്കോയ മുസ്‌ലിയാര്‍ ദിക്‌റ് ദുആ സംഗമത്തിന് നേതൃത്വം നല്‍കി.
സമസ്ത ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍, ട്രഷറര്‍ സി.കെ.എം സാദിഖ് മുസ്‌ലിയാര്‍, ജോയിന്റ് സെക്രട്ടറി എം.ടി അബ്ദുല്ല മുസ്‌ലിയാര്‍, കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി, ടി.വി ഇബ്രാഹീം എം.എല്‍.എ, ഷാജഹാന്‍ റഹ്മാനി കംബ്ലക്കാട്, എസ്.കെ.പി.എം തങ്ങള്‍, കെ.സി മുഹമ്മദ് ബാഖവി, എം,വി കരീം മുസ്‌ലിയാര്‍, കെ.എസ് ഇബ്രാഹീം മുസ്‌ലിയാര്‍, പി.എ ജബ്ബാര്‍ ഹാജി, ബി.എസ്.കെ തങ്ങള്‍, നാസറുദ്ദീന്‍ ദാരിമി, ഗഫൂര്‍ ദാരിമി, പി. മോയുട്ടി മൗലവി, റഫീഖ് ചെറുശ്ശേരി, പി. കുഞ്ഞിമുഹമ്മദ്, എം. അഹമ്മദ് കുട്ടി മാസ്റ്റര്‍ സംബന്ധിച്ചു.