തളിപ്പറമ്പ്: കുറുമാത്തൂരില്‍ 1300ലേറെ കോഴികളെ തെരുവുനായകള്‍ കടിച്ചുകൊന്നു. 200ഓളം കോഴികള്‍ ഗുരുതരമായി പരുക്കേറ്റ നിലയിലാണ്.
കുറുമാത്തൂര്‍ ഡയറിയിലെ പി.വി റാഷിദിന്റെയും സുഹൃത്തുക്കളുടെയും ഉടമസ്ഥതയിലുള്ളതാണ് ഫാം. ഇന്നലെ രാവിലെ ശബ്ദം കേട്ട് തൊഴിലാളികള്‍ ഓടിവരുമ്പോള്‍ നാലു നായകള്‍ ഫാമിനകത്ത് ഉണ്ടായിരുന്നു. പിന്‍വശത്തെ കമ്പിവല തകര്‍ത്താണ് നായ്ക്കൂട്ടം അകത്തു കടന്നത്.
വീടിനു സമീപത്തായി സ്ഥലം പാട്ടത്തിനെടുത്താണ് റാഷിദ് കോഴി ഫാം നടത്തുന്നത്. 25 ദിവസം പ്രായമായ കോഴികളെയാണ് കടിച്ചുകൊന്നത്. ഒന്നര ലക്ഷം രൂപയുടെ നഷ്ടം കണക്കാക്കുന്നു. ചൊറുക്കള വെറ്ററിനറി ക്ലിനിക്കിലെ ഡോ. അനുമോള്‍ ജോസഫ്, ലൈവ് സ്‌റ്റോക്ക് ഇന്‍സ്‌പെക്ടര്‍ ശ്രീകുമാര്‍, പഞ്ചായത്ത്-ആരോഗ്യ വകുപ്പ് അധികൃതര്‍ എന്നിവര്‍ ഫാം സന്ദര്‍ശിച്ചു.