ന്യൂഡല്‍ഹി: സൊഹ്‌റാബുദ്ദീന്‍ ഷെയ്ഖ് വ്യാജ ഏറ്റുമുട്ടലുമായി ബന്ധപ്പെട്ട കേസ് പരിഗണിച്ചിരുന്ന പ്രത്യേക സി.ബി.ഐ കോടതി ജഡ്ജ് ബി.എച്ച് ലോയയുടെ ദുരൂഹ മരണത്തെക്കുറിച്ച് സ്വതന്ത്ര ഏജന്‍സി അന്വേഷിക്കണമെന്ന് ആവശ്യപ്പെട്ടുകൊണ്ടുള്ള ഹരജിയില്‍ ഇന്ന് സുപ്രിം കോടതി വാദം കേള്‍ക്കും.
2014 ഡിസംബര്‍ ഒന്നിനാണ് നാഗ്പൂരിലെ ഒരു ഹോട്ടല്‍ മുറിയില്‍ ഹൃദയാഘാതത്തെ തുടര്‍ന്ന് ലോയ മരിച്ചത്. സഹപ്രവര്‍ത്തകന്റെ മകളുടെ വിവാഹത്തില്‍ പങ്കെടുക്കാനായി എത്തിയതായിരുന്നു അദ്ദേഹം.
ചീഫ് ജസ്റ്റിസ് ദീപക് മിശ്ര, ജസ്റ്റിസുമാരായ എ.എം ഖാന്‍വില്‍കര്‍, ജസ്റ്റിസ് ഡി.വൈ ചന്ദ്രചൂഡ് എന്നിവരടങ്ങിയ മൂന്നംഗ ബെഞ്ചാണ് വാദം കേള്‍ക്കുക. മഹാരാഷ്ട്രയിലെ മാധ്യമ പ്രവര്‍ത്തകനായ ബി.ആര്‍ ലോണ്‍ ആണ് ഹരജി സമര്‍പ്പിച്ചത്. ലോയയുടെ മരണത്തില്‍ ദുരൂഹതയുണ്ടെന്നും ഈ സാഹചര്യത്തില്‍ ഹരജി അടിയന്തരമായി പരിഗണിക്കണമെന്നും ആവശ്യപ്പെട്ടാണ് ലോണ്‍ സുപ്രിം കോടതിയെ സമീപിച്ചത്. ഇന്നലെ ഹരജി പരിഗണിച്ച കോടതി, ഇന്ന് വാദം കേള്‍ക്കുമെന്ന് അറിയിക്കുകയായിരുന്നു.
സൊഹ്്‌റാബുദ്ദീന്‍ ഷെയ്ഖിനെ വ്യാജ ഏറ്റുമുട്ടലിലൂടെ കൊലപ്പെടുത്തിയ കേസില്‍ ബി.ജെ.പി ദേശീയ അധ്യക്ഷന്‍ അമിത് ഷാ, ചില പൊലിസ് ഓഫിസര്‍മാര്‍ എന്നിവരുടെ പേരുകള്‍ ഉള്‍പ്പെട്ടിട്ടുണ്ട്. കേസില്‍ വാദംകേട്ട ജഡ്ജ് ലോയ ശക്തമായ നിലപാടുമായി മുന്നോട്ടുപോകുമ്പോഴാണ് മരിച്ചത്. മരണത്തില്‍ ദുരൂഹതയുണ്ടെന്ന് നേരത്തെ തന്നെ ബന്ധുക്കള്‍ ആരോപണം ഉന്നയിച്ച് രംഗത്തെത്തിയിരുന്നു. ഇതിനു പിന്നാലെയാണ് ഇതുസംബന്ധിച്ച് സ്വതന്ത്ര ഏജന്‍സിയുടെ അന്വേഷണം ആവശ്യമാണെന്ന് വ്യക്തമാക്കി മാധ്യമ പ്രവര്‍ത്തകന്‍ സുപ്രിം കോടതിയെ സമീപിച്ചത്.
2005ലാണ് സൊഹ്്‌റാബുദ്ദീനെ വ്യാജഏറ്റുമുട്ടലിലൂടെ കൊലപ്പെടുത്തിയത്. അദ്ദേഹത്തിനു പുറമെ ഭാര്യ കൗസര്‍ബി, തുളസിദാസ് പ്രജാപതി എന്നിവരും കൊല്ലപ്പെട്ടിരുന്നു. കേസില്‍ അമിത്ഷാ ഉള്‍പ്പെടെ 23 പേരെ കുറ്റക്കാരായി കണ്ടെത്തുകയും ചെയ്തു.
ലോലയയുടെ മരണത്തില്‍ ദുരൂഹതയുണ്ടെന്ന് ബന്ധുക്കള്‍ ആരോപിച്ചതോടെ ബോംബെ ലോയേഴ്‌സ് അസോസിയേഷനും അന്വേഷണം ആവശ്യപ്പെട്ട് ബോംബെ ഹൈക്കോടതിയില്‍ ഹരജി നല്‍കിയിരുന്നു.