വിശാഖപട്ടണം: സയ്യിദ് മുഷ്താഖ് അലി ട്രോഫി ടി20 പോരാട്ടത്തില്‍ കേരളത്തിന് ജയം. തുടര്‍ച്ചയായി മൂന്ന് മത്സരങ്ങളില്‍ തോല്‍വി പിണഞ്ഞ കേരളം നാലാം മത്സരത്തില്‍ ഗോവയെ ഒന്‍പത് വിക്കറ്റിന് പരാജയപ്പെടുത്തി. ആദ്യം ബാറ്റ് ചെയ്ത ഗോവ നിശ്ചിത 20 ഓവറില്‍ എട്ട് വിക്കറ്റ് നഷ്ടത്തില്‍ 138 റണ്‍സെടുത്തപ്പോള്‍ കേരളം ഒരു വിക്കറ്റ് മാത്രം നഷ്ടത്തില്‍ 15.5 ഓവറില്‍ 140 റണ്‍സെടുത്താണ് വിജയിച്ചത്.
അര്‍ധ സെഞ്ച്വറിയുമായി പുറത്താകാതെ നിന്ന സഞ്ജു സാംസണിന്റെ മിന്നല്‍ ബാറ്റിങാണ് കേരളത്തിന്റെ ജയം അനായാസമാക്കിയത്. താരം 44 പന്തുകള്‍ നേരിട്ട് നാല് വീതം ഫോറും സിക്‌സും പറത്തി 65 റണ്‍സെടുത്തു. സഹ ഓപണര്‍ വിഷ്ണു വിനോദിന്റെ വിക്കറ്റ് മാത്രമാണ് കേരളത്തിന് നഷ്ടമായത്. 19 പന്തില്‍ 34 റണ്‍സാണ് വിഷ്ണു നേടിയത്. 33 പന്തില്‍ 37 റണ്‍സുമായി അരുണ്‍ കാര്‍ത്തിക് സഞ്ജുവിന് മികച്ച പിന്തുണ നല്‍കി പുറത്താകാതെ നിന്നു.
നേരത്തെ ടോസ് നേടി കേരളം ഗോവയെ ബാറ്റിങിന് വിടുകയായിരുന്നു. കേരളത്തിന്റെ ബൗളര്‍മാര്‍ മികച്ച രീതിയില്‍ പന്തെറിഞ്ഞതോടെ ഗോവയുടെ സ്‌കോറിങ് മന്ദഗതിയിലായി. കെ.എ വാസ് (36) ഗോവയുടെ ടോപ് സ്‌കോററായി.
ക്യാപ്റ്റന്‍ സഗുന്‍ കമത് (24), ദര്‍ശന്‍ മിസല്‍ (23) എന്നിവരും പിടിച്ചു നിന്നു. കേരളത്തിനായി കെ.എം ആസിഫ്, അഭിഷേക് മോഹന്‍ എന്നിവര്‍ മൂന്ന് വീതം വിക്കറ്റുകള്‍ വീഴ്ത്തി. ബേസില്‍ തമ്പി, ഫാബിദ് അഹമദ് എന്നിവര്‍ ഓരോ വിക്കറ്റും പിഴുതു.