വടകര: ജന്മനാ കാഴ്ചവൈകല്യവും മാനസിക വെല്ലുവിളിയും നേരിടുന്ന റഹീമിനെ തന്റെ മനസിലെ സംഗീതം തളര്‍ത്തിയില്ല.
ഭിന്നശേഷിക്കാരുടെ സംസ്ഥാന കലാമേളയില്‍ ലളിതഗാന മത്സരത്തില്‍ ഒന്നാമതെത്തിയത് ഏറാമല പഞ്ചായത്തിലെ ഓര്‍ക്കാട്ടേരി ബഡ്‌സ് സ്‌കൂളിലെ ഈ മിടുക്കനാണ്.
കുറിഞ്ഞാലിയോട് പനോളിതാഴകുനി കുഞ്ഞമ്മദ്-റംല ദമ്പതികളുടെ മകനായ റഹീമിന്റെ സംഗീതത്തിലുള്ള കഴിവിനെ തിരിച്ചറിഞ്ഞതും പ്രോത്സാഹിപ്പിച്ചതും ബഡ്‌സ് സ്‌കൂളിലെ പ്രധാനാധ്യാപിക ചിത്രയും സഹപ്രവര്‍ത്തകരുമാണ്.
റഹീമിന്റെ ഗാനാലാപനമില്ലാതെ സ്‌കൂളില്‍ ഒരു പരിപാടിയും നടക്കാറില്ല.
തിരുവനന്തപുരത്ത് നടന്ന കുടുംബശ്രീ ബഡ്‌സ് സ്‌കൂള്‍ കലാമേളയില്‍ ചീഫ് സെക്രട്ടറി എസ്.എം വിജയാനന്ദിന്റെ സാന്നിധ്യത്തില്‍ കുടുംബശ്രീ മിഷന്‍ എക്‌സിക്യൂട്ടീവ് ഡയറക്ടര്‍ എസ്. ഹരികിഷോറില്‍ നിന്ന് റഹീം സ്വര്‍ണമെഡലും സര്‍ട്ടിഫിക്കറ്റും ഏറ്റുവാങ്ങി.