മട്ടന്നൂര്‍: നഗരമധ്യത്തില്‍ വീട് കുത്തിതുറന്നു നാല് പവന്‍ സ്വര്‍ണാഭരണങ്ങളും രണ്ടു മൊബൈല്‍ ഫോണുകളും ആയിരം രൂപയും കവര്‍ന്നു. മട്ടന്നൂര്‍ ലയണ്‍സ് ക്ലബ് റോഡില്‍ രസീല നിവാസില്‍ സി രഘുനാഥിന്റെ വീട്ടിലാണ് ഇന്നലെ പകല്‍ മോഷണം നടന്നത്. പൂ കച്ചവടക്കാരനായ രഘുനാഥും ഭാര്യ മട്ടന്നൂര്‍ ഗവ. യു.പി സ്‌കൂളില്‍ പാചക തൊഴിലാളിയുമായ ശ്യാമളയും കോളജ് വിദ്യാര്‍ഥിനിയായ മകളും വീട്ടില്‍ ഇല്ലായിരുന്നു. ഉച്ചയ്ക്ക് ഭക്ഷണം കഴിക്കാന്‍ എത്തിയപ്പോഴാണ് വീടിന്റെ മുന്‍ഭാഗത്തെ വാതില്‍ ഉള്ളില്‍ നിന്ന് പൂട്ടിയതായി ശ്രദ്ധയില്‍പെട്ടത്. പിന്‍വശത്തെ വാതിലുകള്‍ തുറന്നിട്ട നിലയിലായിരുന്നു. കക്കൂസിന്റെ ഓട് നീക്കിയാണ് മോഷ്ടാവ് അകത്ത് കടന്നത്. നടുത്തളത്തെ വാതില്‍ കുത്തിതുറന്നാണ് അകത്ത് സൂക്ഷിച്ച അലമാര തുറന്ന് സ്വര്‍ണാഭരണങ്ങളും മറ്റും മോഷ്ടിച്ചത്. രണ്ടു മുറികളും അലങ്കോലമാക്കിയ നിലയിലാണ്. മട്ടന്നൂര്‍ എസ്.ഐ പി.കെ ബിനീഷിന്റെ നേതൃത്വത്തില്‍ അന്വേഷണമാരംഭിച്ചു.