മാനന്തവാടി: ദേശീയ വിരവിമുക്ത ദിനമായ നാളെ ജില്ലയിലെ ഒന്ന് മുതല്‍ 19 വയസ്സുവരെയുളള 2,16,204 കുട്ടികള്‍ക്ക് വിര നശീകരണത്തിനായുള്ള ആല്‍ബന്‍ഡസോള്‍ ഗുളികകള്‍ നല്‍കാനുള്ള തയാറെടുപ്പുകള്‍ പൂര്‍ത്തിയായതായി ആരോഗ്യ വകുപ്പ് ഉദ്യോഗസ്ഥര്‍ വാര്‍ത്താസമ്മേളനത്തില്‍ അറിയിച്ചു.
സര്‍ക്കാര്‍, എയ്ഡഡ്, അണ്‍എയ്ഡഡ് സ്‌കൂളുകളിലെ വിദ്യാര്‍ഥികള്‍ക്കും, അങ്കണവാടികളിലെയും ഡേകെയര്‍ സെന്ററുകളിലേയും കുട്ടികള്‍ക്കുമാണ് ഡോക്ടര്‍മാര്‍, ആരോഗ്യപ്രവര്‍ത്തകര്‍ എന്നിവരുടെ മേല്‍നോട്ടത്തില്‍ അധ്യാപകര്‍, അങ്കണവാടി വര്‍ക്കര്‍മാര്‍ എന്നിവരാണ് ഗുളിക നല്‍കുന്നത്. ഒന്നു മുതല്‍ 5 വയസ്സുവരെയുളള കുട്ടികള്‍ക്ക് അടുത്തുളള അങ്കണവാടിയിലും അഞ്ചു മുതല്‍ 19 വയസ്സുവരെയുളള കുട്ടികള്‍ക്ക് അതാത് സ്‌കൂളുകളിലും വച്ചാണ് ഗുളിക വിതരണം നടത്തുന്നത്.
ഒന്നു മുതല്‍ രണ്ടു വയസ്സുവരെയുളള കുട്ടികള്‍ക്ക് പകുതി ഗുളിക (200 മി.ഗ്രാം) ഒരു ടേബിള്‍ സ്പൂണ്‍ തിളപ്പിച്ചാറിയ വെള്ളത്തില്‍ അലിയിച്ചാണ് കൊടുക്കുന്നത്. രണ്ടു മുതല്‍ 19 വയസ്സുവരെ ഒരു ഗുളിക (400 മില്ലി ഗ്രാം) ഉച്ചഭക്ഷണത്തിനുശേഷം ചവച്ചരച്ച് കഴിക്കുവാന്‍ നല്‍കുന്നതാണ്. 10ന് ഗുളിക കഴിക്കാന്‍ സാധിക്കാത്തവര്‍ സമ്പൂര്‍ണ വിരവിമുക്ത ദിനമായ ഈമാസം 15ന് തീര്‍ച്ചയായും കഴിക്കേണ്ടതാണ്.
സ്‌കൂളുകളിലും, അങ്കണ്‍വാടികളിലും രജിസ്റ്റര്‍ ചെയ്യാത്ത ഒന്നു മുതല്‍ 19 വയസ്സുവരെയുളള എല്ലാ കുട്ടികള്‍ക്കും പ്രായഭേദമന്യേ ആശാ പ്രവര്‍ത്തകരുടെ സഹകരണത്തോടെ അങ്കണവാടികളില്‍ വച്ച് ഗുളിക നല്‍കുന്നതാണ്.
മണ്ണില്‍ കളിക്കുന്നതിലൂടെയും, ശുചിത്വമില്ലായ്മയിലൂടെയും, നല്ലവണ്ണം വൃത്തിയാക്കാത്തതും, പാചകം ചെയ്യാത്തതുമായ പച്ചക്കറികള്‍, പഴങ്ങള്‍ എന്നിവയിലൂടെയും വിരകള്‍ ശരീരത്തില്‍ പ്രവേശിക്കാന്‍ സാധ്യതയുണ്ട്. ഇവ രക്തത്തിലെ ഹീമോഗ്ലോബിന്റെ അളവ് കുറയ്ക്കുകയും കുട്ടികളില്‍ വിളര്‍ച്ചക്കും, പോഷണക്കുറവിനും തളര്‍ച്ച, വിശപ്പില്ലായ്മ എന്നിവയ്ക്കും കാരണമാകുന്നു.
ഇത്തരം അവസ്ഥകള്‍ ഉണ്ടാകാതിരിക്കാന്‍ ആറ് മാസത്തിലൊരിക്കല്‍ വിരനശീകരണത്തിനുളള ഗുളിക നല്‍കേണ്ടത് അത്യന്താപേക്ഷിതമാണെന്ന് ആരോഗ്യ വകുപ്പധികൃതര്‍ പറഞ്ഞു.
പരിപാടിയുടെ ജില്ലാതല ഉദ്ഘാടനം കാട്ടിക്കുളം ഗവ. ഹയര്‍സെക്കന്‍ഡറി സ്‌കൂളില്‍ വച്ച് രാവിലെ ഒന്‍പതിന് ഒ.ആര്‍ കേളു എം.എല്‍.എ നിര്‍വഹിക്കും.