നിലമ്പൂര്‍: ഒരിടവേളക്ക് ശേഷം അകമ്പാടം, ഇടിവണ്ണ മേഖലകളില്‍ വിദേശമദ്യ വില്‍പ്പന സജീവമാകുന്നു. കഴിഞ്ഞ ദിവസം ഈ മേഖലയില്‍ വിദേശമദ്യ വില്‍പ്പന നടത്തിയ രണ്ട് മധ്യവയസ്‌ക്കരെ എക്‌സൈസ് പിടികൂടുകയും 5000 രൂപ വീതം പിഴ ഈടാക്കുകയും ചെയ്തിരുന്നു.
രാവിലെ മുതല്‍ തന്നെ മേഖലയില്‍ സജീവമാകുന്ന മദ്യവില്‍പ്പന രാത്രി വരെ തുടരും. അകമ്പാടം, ഇടിവണ്ണ അങ്ങാടികള്‍ക്ക് സമീപമാണ് വില്‍പ്പന. ആവശ്യക്കാരുടെ ഓര്‍ഡര്‍ പ്രകാരം മൊത്തമായും ചില്ലറയായും മദ്യം എത്തും.
ബീവറേജില്‍ നിന്നും ലഭിക്കുന്ന മദ്യത്തിന്റെ ഇരട്ടി വിലയാണ് ആവശ്യക്കാരില്‍ നിന്നും ഇവര്‍ ഈടാക്കുന്നത്. മദ്യപന്‍മാരില്‍ പലരും അങ്ങാടിയില്‍ തങ്ങുന്നത് ജനങ്ങളുടെ സൈ്വര്യജീവിതത്തിന് തടസം സൃഷ്ടിക്കുന്നുണ്ട്. പൊലിസും എക്‌സൈസും ഈ മേഖലയില്‍ കൂടുതല്‍ പരിശോധനകള്‍ നടത്തണമെന്ന ആവശ്യം ശക്തമായിരിക്കുകയാണ്.
അകമ്പാടം, ഇടിവണ്ണ, പെരുവമ്പാടം, വെണ്ണേക്കോട്, നമ്പൂരിപ്പൊട്ടി, പെരുമ്പത്തൂര്‍, വേട്ടേക്കോട് എന്നിവിടങ്ങളിലായി പതിനെട്ടോളം പേരാണ് മദ്യവില്‍പ്പന രംഗത്തുള്ളത്. ദിവസം ആയിരം മുതല്‍ രണ്ടായിരം രൂപ വരെ സമ്പാദിക്കുന്നവരാണ് ഇവരിലേറെയും. ഇതിനാല്‍ തന്നെ എക്‌സൈസ് വകുപ്പ് അയ്യായിരം രൂപ പിഴയിടുന്ന സമയങ്ങളില്‍ കൂടുതല്‍ മദ്യം വാങ്ങി വില്‍പ്പന നടത്തി ഒരാഴ്ചക്കുള്ളില്‍ ഈ നഷ്ടം നികത്താറാണ് പതിവ്. മദ്യം തങ്ങളുടെ ആവശ്യത്തിന് ലഭ്യമായി തുടങ്ങിയതോടെ മദ്യപന്‍മാര്‍ അങ്ങാടികളില്‍ തങ്ങി ജനങ്ങളെ അസഭ്യങ്ങള്‍ പറയുന്നത് പതിവായിട്ടുണ്ട്. ഓട്ടോറിക്ഷകള്‍ കേന്ദ്രീകരിച്ചും ബൈക്കുകള്‍ ഉപയോഗിച്ചും കോളനി നിവാസികളെ ലക്ഷ്യമിട്ട് മദ്യം എത്തിച്ചുനല്‍കുന്നവരും സജീവമാണ്.
അമ്പുമല, വെണ്ണേക്കോട്, പെരുവമ്പാടം,കല്ലുണ്ട, വൈലാശേരി, പാലക്കയം, വെറ്റിലക്കൊല്ലി എന്നീ കോളനികളിലെല്ലാം മദ്യം ആവശ്യാനുസരണം എത്തിച്ചു നല്‍കുന്ന സംഘങ്ങളുണ്ട്. മദ്യത്തിന്റെ മൂന്നിരട്ടി വരെയാണ് ആദിവാസികളില്‍ നിന്നും ഇവര്‍ ഈടാക്കുന്നത്. യു.ഡി.എഫ് ഭരണകാലത്ത് ചാലിയാര്‍ പഞ്ചായത്തില്‍ മദ്യവിമുക്ത പഞ്ചായത്തായി പ്രഖ്യാപിച്ചിരുന്നു.
എന്നാല്‍ ഇന്ന് ചാലിയാര്‍ പഞ്ചായത്തില്‍ വിദേശമദ്യം ലഭിക്കാത്ത പ്രദേശങ്ങള്‍ ചുരുക്കമാണ്. വിദേശമദ്യ വില്‍പ്പന സംഘങ്ങളെ സംബന്ധിച്ച് യഥാസമയം വിവരം നല്‍കണമെന്ന് എക്‌സൈസ് സംഘം പൊതുജനങ്ങളോട് ആവശ്യപ്പെട്ടു.
ഫോണ്‍: 04931224334